Монгол Улсын шүүхийн 2025 оны шүүн таслах ажиллагааны статистикийн нэгдсэн дүн мэдээг Шүүхийн ерөнхий зөвлөлөөс танилцуулж байна.

Иргэний хэргийн анхан шатны шүүхээр 95 мянган хэргийг шийдвэрлэжээ. Хэргийн 3.2 хувийг давж заалдах шатны шүүхээр хянан шийдвэрлэсэн байна.

Сүүлийн жилүүдэд банк, банк бус санхүүгийн байгууллагаас олгох зээлтэй холбоотой маргаан тогтмол өссөн дүнтэй байна. Тухайлбал 2025 онд энэ төрлийн 18 мянган хэргийг шүүхээр шийдвэрлэжээ.

Гэр бүлийн тухай хуулиар 6958 хэрэг, маргаан хянан шийдвэрлэв. Энэ нь өмнөх оноос 6.7 хувиар өссөн дүн юм.

Эрүүгийн гэмт хэргийн хувьд авто тээврийн хэрэгслийн аюулгүй байдал, журам зөрчих гэмт хэрэг 59.6 хувиар, кибер аюулгүй байдлын эсрэг гэмт хэрэг 33.3 хувиар, мансууруулах эм, сэтгэцэд нөлөөлөх бодисыг хууль бусаар ашиглах гэмт хэрэг 11.9 хувиар, залилах гэмт хэрэг 10.3 хувиар, хүнийг алах гэмт хэрэг 29.1 хувиар өсжээ.

Хулгайлах гэмт хэрэг 7 хувиар, хүчиндэх гэмт хэрэг 0.03 хувиар, мал хулгайлах гэмт хэрэг 19 хувиар, гэр бүлийн хүчирхийлэл үйлдэх гэмт хэрэг 20 хувиар буурсан байна. 2025 онд нийт 15,465 хүнд ял оногдуулсан бөгөөд 2528 хүнд хорих ял оноожээ. Мөн 1900 хүний зорчих эрхийг хязгаарласан байна.