XVII жарны “Сүрээр дарагч” хэмээх гал морин жилийн сар шинийн баярт зориулсан Улс, аймаг, цэрэг, сумын алдар цолтой 256 бөхийн барилдаанд Завхан аймгийн Яруу сумын харьяат, “Хилчин" спорт хороо, Хилийн цэргийн  0208-р анги, ”Завхан Даян” дэвжээний бөх, улсын заан Мөнхтөрийн Лхагвагэрэл түрүүлж, Ховд аймгийн Буянт сумын харьяат, "Аврагч" спорт хороо, ”Ховд” дэвжээний бөх, улсын аварга Оргихын Хангай үзүүрлэсэн.

Улсын заан М.Лхагвагэрэл долоогийн зургаагийн даваанд Дархан аварга Н.Батсуурийг давж, үзүүр түрүүнд аварга О.Хангайтай үлдэж урамтай сайхан барилдан түрүүлсэн билээ.

Сар шинийн барилдааны түрүү бөх, Улсын заан М.Лхагвагэрэл, 2023 оны цагаан сарын барилдаанд би шөвгийн дөрөвт, 2024 оны барилдаанд шөвгийн наймд, 2025 онд О.Хангай ахтайгаа үлдээд, үзүүрлэж байв. Энэ жил түрүүлсэндээ сэтгэгдэл өндөр байна.

Миний хувьд намрын алтан цомд бэлтгэл сайн байсан. Жижиг бэртлүүд их авсан. 12-р сард гуяндаа бас бэртэл авсан, тэр бэртэл эдгэрч өгдөггүй. Барилдмаар байдаг, барилдахаар хөндөгдөөд байдаг. Тэр бэртлээс болоод ойрын хэдэн барилдаанд доогуур даваанд унасан. Одоо бэртэж илааршиж, арай дээр болж байна.

Сар шинийн барилдааныг бага наадам гэдэг. Бөхчүүд тэр жилийн барилдааны өнгөө тодорхойлдог, бэлтгэл сургуулилт жигдэрсэн нэлээн ач холбогдол өгдөг барилдаанд аварга, арслан, заан ах нар, дүү нартайгаа барилдаж түрүүлсэндээ маш их баяртай байна.

Завханчууд болон монгол түмэндээ Гал морин жилийн сар шинийн баярын мэндийг дэвшүүлье. Сайхан шинэлээрэй хэмээн мэндчилгээ дэвшүүллээ.