Манай улсад жуулчны визээр нэвтэрсэн, БНХАУ-ын иргэдийг албадан гаргаж эхэллээ. Тэднийг УБТЗ-ын галт тэргээр Замын-Үүд-Эрээний боомтоор явуулах аж. Нийт 758 иргэнийг албадан гаргах юм. Тэднийг байрлаж байсан зочид буудлаас нь Улаанбаатар вагон депо руу хүргэсэн.
Албадан гаргаснаар эдгээр иргэдэд манай улсын хилээр дахин орж ирэхэд нь хязгаарлал тогтоож байгаа хэрэг юм.
Манай улсад хууль бусаар амьдарч, ажиллаж буй иргэдийг Гадаад иргэн, харьяатын газраас албадан гаргах чиг үүрэгтэй. Өнгөрөгч аравдугаар сарын 29-30-нд шилжих шөнө Тагнуулын ерөнхий газар болон Эрүүгийн цагдаагийн албаныхан нийслэлийн гурван дүүрэгт гүйцэтгэх ажил явуулж, нэр бүхий зочид буудлуудаас цахим луйврын хэрэг үйлдсэн байж болзошгүй 783 хятад иргэнийг саатуулан, баривчилсан. Дээрх иргэдийг саатуулсан хэргийн газруудаас “Iphone-6” загварын 10 мянга гаруй гар утасны сим, өндөр хурдны үзүүлэлттэй 1000 гаруй суурин компьютер хураан авч, шалгаж байгаа юм.
Тагнуулын ерөнхий газар, Эрүүгийн цагдаагийн газар болон Гадаадын иргэн, харьяатын газар аравдугаар сарын 29-30-нд шилжих шөнө хамтарсан шалгалт явуулсан. 783 гадаадын иргэний пасспорт, бичиг баримтад шалгалт хийсэн бөгөөд
- 637 нь жуулчин ангиллын,
- 146 нь бизнес ангиллын 30 хүртэл хоногийн визтэй ирсэн БНХАУ-ын иргэд ирсэн зорилгоосоо өөр үйл ажиллагаа явуулсан болох нь тогтоогдсон юм.
Эдгээр иргэдийг Гадаадын иргэний эрх зүйн байдлын тухай хуулийн 37.1.7 буюу ирсэн зорилгоосоо өөр үйл ажиллагаа явуулсан үндэслэлээр Монгол Улсад 3 жилийн хугацаанд дахин оруулахгүй байхаар хугацаа тогтоон, Замын-Үүд олон улсын боомтоор албадан гаргаж, БНХАУ-ын талд хүлээлгэн өгөх ажиллагааг өнөөдөр зохион байгуулж байна.
Жуулчин (J), бизнес (В) ангиллын 30 хүртэлх хоногийн визийг Монгол Улсаас гадаад улсад суугаа Дипломат төлөөлөгчийн болон Консулын газар олгодог бөгөөд жуулчин ангиллын 30 хүртэл хоногийн визээр хил нэвтэрсэн 637 иргэний
- 586 нь БНХАУ-ын Хөх хотод суугаа Ерөнхий консулын газар,
- 30 нь Эрээн хотод суугаа консулын газар,
- 21 нь БНХАУ-д суугаа Бээжин дэх ЭСЯ-аас виз авсан байна.
Бизнес ангиллын 30 хүртэл хоногийн визээр хил нэвтэрсэн 146 иргэний 94 нь БНХАУ-ын Эрээн хотод суугаа консулын газар, 48 нь Хөх хотод суугаа Ерөнхий консулын газар, 4 нь Хонконг дахь Ерөнхий Консулын газраас тус тус виз авсан гэж ГИХГ-аас мэдээлэв.
