УИХ-ын чуулганы хуралдаанаар Г.Байгалмаа, Э.Батболд, Б.Ганбат, О.Амгаланбаатар, Д.Баяндүүрэн нарыг СЕХ-ны орон тооны бус гишүүнээр томиллоо.

Сонгуулийн төв байгууллагын тухай хуульд Сонгуулийн ерөнхий хороо нь есөн гишүүний бүрэлдэхүүнтэй байх бөгөөд тэдгээрийн хоёр нь орон тооны, долоо нь орон тооны бус байхаар заасан. Түүнчлэн хорооны гишүүний тавыг Улсын Их Хурлын Төрийн байгуулалтын байнгын хороо, хоёрыг Монгол Улсын Ерөнхийлөгч, хоёрыг Улсын дээд шүүх төрийн жинхэнэ албан хаагчдаас санал болгосноор Улсын Их Хурал зургаан жилийн хугацаагаар томилохоор зохицуулсан байдаг.

Сонгуулийн ерөнхий хорооны орон тооны гурван гишүүний бүрэн эрхийн хугацаа дууссан, нэг гишүүн өөр ажилд томилогдсон учраас гишүүнээс чөлөөлөх, гишүүнээр томилох асуудлыг хэлэлцэж шийдвэрлэх шаардлага үүсчээ.

Сонгуулийн ерөнхий хорооны орон тооны бус гишүүнд Ерөнхийлөгч Г.Байгалмаа, Э.Батболд нарыг Улсын дээд шүүхийн нийт шүүгчдийн хуралдаанаас шүүгчдийн олонхын саналаар О.Амгаланбаатар, Д.Баяндүүрэн нарыг, УИХ-ын Төрийн байгуулалтын байнгын хорооноос Б.Ганбат нарыг нэр дэвшүүлээд байсан юм.

УИХ-ын 75 гишүүний 42 нь нэгдсэн хуралдаанд оролцон Сонгуулийн ерөнхий хорооны орон тооны бус гишүүдийг чөлөөлөх, томилох асуудлаар асуулт асууж, үг хэлэх гишүүн байгаагүй тул санал хураалт явуулж нэр дэвшигчдийг олонхийн саналаар томиллоо.