Тайванийн нийслэл Тайпей хотын ойролцоох уулан дунд өнөөдөр нисдэг тэрэг осолдож, зургаан хүн амиа алдсан талаар “Reuters” агентлаг мэдээллээ.

UH-60M загварын онгоцонд 13 цэргийн офицер сууж явсан бөгөөд 10 хүний байршил тогтоогдсон гэж Тайванийн Батлан хамгаалахын яамнаас гаргасан мэдэгдэлд дурджээ. Зарим нь онгоцон дотроо гацсан байдалтай олдсон байна. Одоогоор 5 хүн эсэн мэнд байгаа гэж албаны хүмүүс мэдэгдэв.

Гурван хүн сураггүй болсны дотор Тайванийн Жанжин штабын дарга, Нисэх Хүчний генерал Шен Еи Минг багтаж байгаа аж. Онцгой байдлын алба хаагчид эрэн хайх, аврах ажиллагааг үргэлжлүүлж байна. Ямар шалтгааны улмаас онгоц ослын буулт хийсэн нь тодорхойгүй байна. Өнөөдөр өглөө орон нутгийн цагаар 08:22-д нисгэгчээс холбоо тасарчээ. Эрх баригчид байгалийн эсвэл механикийн гэмтэл гарсан эсэхийг тодруулахаар ажиллаж байгаа аж. 

Тайванийн Батлан хамгаалахын салбарын томоохон төлөөлөгчид шинэ жилийн баярыг тохиолдуулан Илань хотын цэргийн баазад зочлохоор явж байхдаа осолдсон байна. Энэхүү хэрэг Ерөнхийлөгч болон Парламентын сонгууль болохоос 7 хоногийн өмнө гарчээ. Ардчилсан сонгууль нэгдүгээр сарын 11-нд товлогдоод байгаа юм.

Эх сурвалж: Reuters, TASS