Замын-Үүд дэх төмөр замын ачих, буулгах хэсэгт бөөгнөрөл үүсч иргэдийг бухимдуулдаг асуудал одоо нэг намжих бололтой. Замын-Үүдийн төмөр замын өртөө, боомтоор дамжин ирж буй ачаа барааны бөөгнөрлийг сааруулах, жилээс жилд өсөн нэмэгдэж буй импортын барааг түргэн шуурхай тээвэрлэх, үйлчлүүлэгчдийн тав тухыг хангах үүднээс "Улаанбаатар төмөр зам" хувь нийлүүлсэн нийгэмлэг тус боомтод шилжүүлэн ачих шинэ талбай байгуулж, эхний хэсгийг ашиглалтад орууллаа.

Шилжүүлэн ачих хуучин талбай өдөрт 202 вагонд бараа тээвэрлэх хүчин чадалтай юм. Гэвч зам, талбайн хэмжээ багатайн улмаас 250 хүртэлх вагоныг дээрх зориулалтаар ашиглаж байжээ. Тэгвэл эхний ээлжийн шинэ талбай ашиглалтад орсноор нэг дор 80 вагонд ачаа тээвэрлэх боломжтой болж буй аж. Талбайн хэмжээ нэмэгдэхийн хэрээр ажлын шинэ байр бий болж, УБТЗ, Монголын залуучуудын холбоотой хамтран гэрээт ажилчид элсүүлж буй талаар бид өмнө нь мэдээлсэн билээ. Одоогоор 64 залуу гэрээт ажил эрхлэхээр Замын-Үүдийг зориод байна.

Сүүлийн үеийн мэдээнээс үзвэл, Замын-Үүдийн төмөр замын өртөө, боомтоор дамжин ирж буй ачаа бараа өнгөрсөн жилийн мөн үеийнхээс 30-60 хувиар өссөн үзүүлэлттэй байна. Мөн тус боомтоос Улаанбаатар руу ачуулсан нийт барааг өнгөрсөн оны эхний дөрвөн сарынхтай харьцуулахад тав дахин нэмэгдсэн аж. Шилжүүлэн ачих шинэ талбайг ашиглалтад оруулснаар ачааны бөөгнөрлийг 50 хувиар бууруулах боломж бүрдэж байгаа тухай мэргэжлийн хүмүүс ярив. Тиймээс иргэд, компаниудын бухимдал намжиж, барааны үнэ бага ч гэсэн буурах боломж бүрдэж байгаа гэж хэлж болох нь.

Мөн тус нийгэмлэг саяхан ачих, буулгах 44 дүгээр замд үүсээд буй ачааллыг бууруулахаар Улаанбаатар-Амгалан ачиж, буулгах хэсэгт хоёр зам, долоон агуулах бүхий 54 мянган ам.метр талбай ашиглалтад оруулсан байна.

Э.Сайхан