Сонгуулийн ерөнхий хорооноос сонгуулийн санал хураалтын үйл явцын талаар мэдээлж байна.

Сонгуулийн ерөнхий хорооны Тамгын газрын дарга Д.Бат-Эрдэнэ, Улсын хэмжээнд нийт 7 санал тоолох төхөөрөмжийг нөөц төхөөрөмжөөр сольсон. Тодруулбал төхөөрөмж бохирдсоны улмаас цаасны бөөгнөрөл үүсэх, саналын хуудсыг буцааж гаргах зэрэг тохиолдол илэрсэн. 

СЕХ-оос энэ удаагийн сонгуульд нийт 2789 санал тоолох төхөөрөмжийг үндсэн төхөөрөмжөөр хуваарилж, 154 төхөөрөмжийг нөөцөөр хуваарилсан. Бид одоогийн байдлаар нөөцийн төхөөрөмжүүдээс долоог нь ашиглаад байна гэв.

Цагдаагийн ерөнхий газрын Зөрчлийн хэрэг бүртгэх албаны дарга, цагдаагийн хурандаа Э.Товуудорж, Улсын хэмжээнд нийт 1104 гомдол мэдээлэл бүртгэгдсэнээс нийслэлд 665, орон нутагт 439 нь бүртгэгдсэн. Үүнээс гэмт хэргийн 420, зөрчлийн 684 дуудлага мэдээллийг хүлээн авч, холбогдох шалгалтын ажиллагааг явуулж байна.
Гэмт хэргийн шинжтэй 420 гомдол мэдээллээс Эрүүгийн хуулийн 14.8 буюу нэр дэвшигчийн талаар илт худал мэдээлэл тараах дуудлага мэдээлэл 259 буюу нийт дуудлага мэдээллийн 61.6 хувийг эзэлсэн. 

Эрүүгийн хуулийн 14.5 буюу иргэн сонгуулийн эрхээ эдлэх, сонгуулийн ажилд саад учруулах гэх зүйл ангиар 83 гомдол мэдээлэл ирсэн хэмээн танилцууллаа.