ОБЕГ: Аврах гарцаа чөлөөлье

Онцгой нөхцөл байдал үүсэхэд хэдхэн секунд хүний амь насыг шийддэг. Гал түймэр, газар хөдлөлт, барилгын осол зэрэг аюулт нөхцөлд хүмүүсийг аюулгүй бүсэд хүргэх хамгийн чухал хэрэгслийн нэг нь аврах шат юм. Өөрөөр хэлбэл Аврах шат бол төмөр хэрэгсэл биш. Энэ бол хэн нэгний амьд гарах гарц юм. 

Сүүлийн жилүүдэд өндөр барилга, орон сууцны тоо нэмэгдэхийн хэрээр онцгой байдлын үед иргэдийн аюулгүй байдлыг хангах асуудал улам чухал болжээ. Ялангуяа гал түймрийн үед цахилгаан шат ашиглах боломжгүй болдог тул гарц, шатны аюулгүй байдал хүний амь насыг хамгаалах гол нөхцөл болдог байна.

Онцгой байдлын ерөнхий газрын мэдээлснээр иргэд барилга байгууламжид нүүх, амьдрахдаа аврах гарц, шат, дохиоллын системийг урьдчилан шалгаж хэвших хэрэгтэй аж. Учир нь зарим тохиолдолд аврах гарцыг эд зүйлсээр хаах, шатны талбайг зориулалтын бусаар ашиглах нь ослын үед эрсдэлийг нэмэгдүүлдэг.

Мөн мэргэжилтнүүд айл өрхүүдийг анхан шатны галын хор, утааны баг, олсон шат зэрэг энгийн хамгаалах хэрэгсэлтэй байхыг зөвлөж байна. Ялангуяа бага насны хүүхэд, өндөр настантай айл өрхүүд ослын үеийн гарц, цуглах цэгээ урьдчилан тохирч, тогтмол дадлага хийх шаардлагатайг анхааруулжээ.

Иймээс иргэд аюулгүй байдлын мэдлэгтэй байж, оршин суугаа орчныхоо аврах гарц, шатыг чөлөөлж гэнэтийн үед гарах боломжийг бүрдүүлэх нь өөрийн болон бусдын амь насыг хамгаалахад чухал үүрэгтэй.