БНХАУ-ын Саньяа хотноо зохион байгуулж буй “Саньяа 2026”  спортын наадам өдрөө амжилттай үргэлжилж байна.

Азийн элсний VI наадмын 3х3 сагсан бөмбөгийн хэсгийн тоглолтууд үргэлжилж байна. Эрэгтэй шигшээ баг Индонезийн шигшээ багийг   15:12-оор хожиж хэсгийн эхний ялалтаа авлаа.  Дараагийн  учраа Малайзын  шигшээ баг байна.

3х3 эмэгтэй сагсан бөмбөгчид хэсгийн эхний тоглолтоо Хятадын Тайванийн шигшээ багийн эсрэг хийж, 20:18 харьцаатай яллаа. Тэдний дараагийн учраа Малайзын шигшээ баг юм. 

МҮОХ-ны ерөнхийлөгч, ОУОХ-ны гишүүн Б.Баттүшиг тамирчдын хотхонд зочилж, Монголын баг тамирчидтай уулзан амжилт хүсэж, жиюү жицүгийн медаль хүртсэн тамирчдад хүндэтгэл үзүүллээ.

Тэрбээр тамирчдын бэлтгэл, байрлах орчин нөхцөлтэй танилцаж, тэмцээний үлдсэн өдрүүдэд өндөр амжилт гаргахыг ерөөсөн юм. Монголын багийн хувьд жиюү жицү, элсний спортын бусад найман төрөлд өрсөлдөж байна.

Тус наадмын тамирчдын хотхон нь далайн эргийн амралтын бүсэд байрласан, орчин үеийн тохижилт бүхий цогцолбор, нийт 45 Үндэсний Олимпын Хорооны баг тамирчдыг хүлээн авчээ. 1,635 тамирчин (959 эрэгтэй, 676 эмэгтэй), 924 дасгалжуулагч, албаны хүн оролцож байгаа бөгөөд тэдний өдөр тутмын үйл ажиллагааг дэмжих зорилгоор 700 сайн дурын ажилтан, 400 гаруй аюулгүй байдлын ажилтан, 100 хотхоны менежер зэрэг нийт 5,100 гаруй хүн ажиллажээ. 

Баг тамирчдын тав тух, хоол хүнс, үйлчилгээний нөхцөлийг бүрэн хангаж байна. “Саньяа 2026” наадам элсний болон далайн спортын төрлүүдийг нэг дор цогцлоосон, олон улсын томоохон арга хэмжээ бөгөөд оролцогч орнуудын хувьд туршлага солилцох, хамтын ажиллагааг бэхжүүлэх чухал ач холбогдолтой юм.
Монголын баг тамирчид үлдсэн өдрүүдэд медалийн төлөө өрсөлдөж, эх орныхоо нэрийг өндөрт өргөхөөр зорьж байна.

Эх сурвалж: Монголын үндэсний олимпын хороо 
Фото: Д.Нямбилэг