Эрчим хүчний дэд сайд С.Далхаасүрэн өнөөдөр Төрийн ордонд дараах мэдээллийг өглөө.

-Эрчим хүчний сайдын 2026.03.02-ны өдрийн 42 тоот тушаалаар хэрэглэгчийн сэргээгдэх эрчим хүчний (СЭХ) үүсгүүрээс үйлдвэрлэсэн эрчим хүчийг түгээх сүлжээнд нийлүүлэх журмыг шинэчлэн баталлаа.

Салбарын сайдын 2020 оны 159-р тушаалаар батлагдсан өмнөх журам хэрэглэгч, ААН-үүдээс техникийн нөхцөл, тусгай зөвшөөрөл, зураг төсөл шаарддаг. Энэ нь 3-6 сар үргэлжилж, хүндрүүлдэг гомдол удаа дараа ирсэн. Тиймээс өмнөх журмыг хялбаршуулсан гэв. 

УИХ-ын гишүүн М.Энхцэцэг "УИХ-аас СЭХ-ний хөгжлийг эрчимжүүлэх чиглэлийг Засгийн газарт өгсөн тогтоолыг оны өмнөхөн баталсан. Тогтоолыг хэрэгжүүлэх хүрээнд ЭХЯ тархмал эх үүсвэрээс цахилгаан эрчим хүч худалдаж авах журмыг шинэчилсэн. Шинэ журмаар тархмал СЭХ-ийг сүлжээнд холбох үе шат, төрийн байгууллагын үйлчилгээнд зарцуулах хугацаа, батарейн шаардлагыг бүдүүвчилсэн зургаар үзүүлэв" гэжээ.

Манай улсад өнөөдрийн байдлаар эрчим хүч түгээх сүлжээнд 111 иргэн, ААН эрчим хүч нийлүүлж байна. 76 айл, 35 ААН байна. Сэргээгдэх эрчим хүчинд нар, салхи, батарей хуримтлуур багтана.