ИЗНН ээлжит бус их хурлаа зохион байгуулж, намын дарга, УИХ-ын гишүүн, БОУАӨ-ийн сайд Б.Батбаатарыг намаа хөөх шийдвэр гаргасан гэж мэдэгдсэн.  Тэрбээр намын нөхдийн хамт өнөөдөр /2026.03.10/ мэдээлэл хийлээ. 

Б.Батбаатар, 2026 оны 3-р сарын 9-ний өдөр ИЗНН-ын 26 жилийн ойн өдөр боллоо. 1999 онд С.Зориг агсны журмын нөхөд, бидний энгийнээр ярьдгаар фракцынхан нь Иргэний Зориг намыг байгуулахаар шийдвэрлэсэн. Шударга ёсны хэм хэмжээ алдагдлаа, шударга бус байдлын эсрэг бодлогоо тодорхойлж ИЗНН байгуулагдсан түүхтэй.

2000 оны 3-р сарын 9-ний өдөр анхдугаар хуралдаанаа хийж, Ногоон нам нэгдсэнээр ИЗНН-ыг байгуулснаа зарлаж, 2000 оны УИХ-ын сонгуульд оролцон парламентад суудалтай нам болж 16 жил явсан байдаг.

ИЗНН бол хоёр үндсэн тулах баганатай.

• Шударга ёс, ардчиллын төлөөх үндэсний үзэл баримтлалтай.
• Ногоон үзэл баримтлал, ногоон соёл иргэншил, байгаль орчны тэргүүлэх үндсэн чиглэл улс төрийн үзэл баримтлалтай нам юм.

2016 онд миний бие ИЗНН-д элсэж, УИХ-ын 5-р тойрогт нэр дэвшин өрсөлдөж байсан.  10 дахь жилдээ энэ намын гишүүнээр ажиллаж байгаагийн сүүлийн хоёр жилд нь намын даргаар сонгогдон ажиллаж байна. Улсын Дээд шүүхэд миний бие ИЗНН-ын дарга гэсэн бүртгэлтэй байгаа. Нэр бүхий хүмүүс гишүүд, иргэд 2026 оны 3-р сарын 9-ний өдөр Намын онц их хурал гэх зүйл хийсэн гэх мэдээлэл авсан.  Тэрхүү дүрэм бус, хууль бус ажиллагаанд манай намын дэд дарга нар, дүүргийн намын арга нар очиж, “Хууль бус ажиллагаагаа зогсоох шаардлагатай, намын гишүүдийг төөрөгдөлд оруулж болохгүй” гэсэн байр сууриа илэрхийлэхээр очсон боловч хамгаалалтын албаныхныг ажиллуулж, буруу мэдээлэлд автсан хүмүүст үнэн зөв, албан ёсны мэдээлэл хүргэх боломж олгоогүй.

Намын дүрэмд Онц их хурал гэсэн ойлголт байхгүй. Намын дүрмээр намын их хурлыг зарлах процессыг товч хэлье. Намын дарга Улс төрийн зөвлөлийн хурлын товыг зарлана. Улс төрийн зөвлөл хуралдаад, 7-гоос дээш хоногийн өмнө Үндэсний хорооны зөвлөлийн хурал зарлах тогтоол гаргана. Үндэсний хороо хуралдаад 30-аас дээш хоногийн хугацаанд Намын их хурлыг зарлах, хуралдуулах зохицуулалттай байдаг. Өмнөх өдөр нь зарлаад, маргааш нь намын их хурал хуралдуулдаг зохицуулалт ИЗНН-ын дүрэмд байхгүй. Улс төрийн намын тухай хуульд ч байхгүй.