Монгол Улсын Ерөнхийлөгчийн ивээл дор НХХЯ, НҮБ-ийн Хөгжлийн хөтөлбөр, ОУХБ-аас хамтран зохион байгуулж байгаа “Шинэ ажлын байр нэмэгдүүлэх жил-2007” сэдэвт хөдөлмөр эрхлэлтийн Үндэсний чуулга уулзалтанд Төрийн тэргүүн Н.Энхбаяр оролцож үг хэллээ.

Ерөнхийлөгч Н.Энхбаяр “Хөдөлмөр эрхлэлт, ядуурлын асуудлыг шийдэхэд төр засаг, олон улсын байгууллагуудаас гадна иргэд, олон нийтийн байгууллага, хувийн хэвшлийн оролцоо чухал шаардлагатай. Цаашид ажлын байр бий болгох, хөдөлмөр эрхлэлтийг нэмэгдүүлэхэд боловсролын байгууллагууд мэргэшсэн сайн боловсон хүчин бэлтгэх, хөрөнгө оруулалтыг нэмэгдүүлэх эрх зүйн таатай орчин бүрдүүлэх, авилга хээл хахууль, хүнд сурталтай тэмцэх, ажил эрхэлж байгаа хүмүүсийн  цалинг хүртээмжтэй байлгахад төрөөс анхаарч ажиллах нь зүйтэй гээд эцэст нь аливаа асуудалд тоон үзүүлэлтээс чанарын үзүүлэлт чухал болох”-ыг онцолж хэллээ.

Үндэсний чуулга уулзалтанд УИХ, Засгийн газар, НҮБ, ОУХБ болон МАОЭНХ, МҮЭХ зэрэг төрийн бус байгууллагын нийт 160 гаруй төлөөлөгчид оролцож байгаа бөгөөд хоёр өдөр үргэлжилнэ.