Жүжигчин Брэд Питт энэ жил "Once Upon a Time in Hollywood", "Ad Astra" зэрэг нэр хүндтэй кинонд дүр бүтээж, карьерын хувьд амжилттай явж байгаа билээ. Тэрээр фитнесээр хичээллэн эрүүл, эерэг амьдралын хэв маягт шилжих гэж багагүй хичээл зүтгэл гаргасан тухайгаа “The New York Times" сонинд өгсөн ярилцлагадаа дурджээ.

2016 онд Брэд Питт, Анжелина Жоли нар 11 жилийн хамтын амьдралаа эцэслэх шийдвэр гаргасан нь олныг цочирдуулсан. Тухайн үед зургаан хүүхэдтэй Холливудын алдарт хосын салах болсон шалтгааныг архитай холбон тайлбарлаж байв. Харин Брэд Питт “The New York Times” сонинд өгсөн ярилцлагадаа архинд донтсон гэдгээ хүлээн зөвшөөрөхөөс гадна хувийн амьдралынхаа талаар илэн далангүй ярилцжээ Тэрээр “Би бүх зүйлийг хязгаарт нь хүргэсэн байсан тул архи уухаа зогсоосон” хэмээсэн байна.

Өөрийнхөө муухай талыг хүмүүст илчлэх нь өөрийгөө чөлөөлөхтэй адил мэдрэмж өгсөн

Мөн Анжелина Жоли гэрлэлтээ цуцлуулахаар өргөдөл гаргасны дараа Брэд Питт "Alcoholics Anonymous" нийгэмлэгт элсэн 1,5 жилийг өнгөрөөжээ. Тус нийгэмлэгт ижил зовлонтой ч огт танихгүй хүмүүс туршлагаа хуваалцан бие биенийгээ дэмжиж хоорондоо ярилцдаг гэнэ. Брэд Питтийг бие болон сэтгэл санааны хувьд эргэн сэргэхэд уг нийгэмлэгийн залуучууд ихээхэн тусалжээ. Ингэсний үр дүнд архинд донтох өвчнөөсөө ангижирч чадсан байна. Тэрээр энэ талаар сэтгэгдлээ хуваалцахдаа “Би тэнд залуучууд тойрч суугаад нээлттэй, шударгаар асуудлаа ярилцаж байхыг сонссон. Би өмнө нь хэзээ ч ийм илэн далангүй зүйлс сонсож байсангүй. Энэ бол шүүмжлэлийн талаар ярьж болох хамгийн аюулгүй газар” хэмээжээ.

Тухайн үед нийгэмлэгийн залуучууд Брэд Питтийг хүндэтгэн, нэг нь ч түүний өөрийнхөө талаар ярьсан түүхүүдийг хэвлэлийнхэнд худалдаагүй гэнэ. “Өөрийнхөө муухай талыг хүмүүст илчлэх нь өөрийгөө чөлөөлөхтэй адил мэдрэмж өгсөн” гэж Брэд Питт өгүүлжээ. Ийнхүү жүжигчин залуу "Alcoholics Anonymous" нийгэмлэгт 1,5 жилийг өнгөрүүлсний дараа бие болон сэтгэл санааны хувьд дахин сэргэж, ажилдаа шамдан орсон аж.

Эх сурвалж: Wmagazine