Монгол Улсын Ерөнхийлөгч Н.Энхбаяр Богд  Очирваань бурхныг зээгт наамлын аргаар бүтээхэд биечлэн хувь нэмэр оруулсан, хандив туслалцаа үзүүлсэн зарим хувь хүн, албан байгууллагад Ерөнхийлөгчийн нэрэмжит батламж гардууллаа.

Ерөнхийлөгчийн батламжид “Монгол газар орон, хүн зоны цог хийморь, заяа буяныг тэтгэн ивээх учрал ерөөлт их ядам сахиус бол монголчуудын эртний уламжлалт шүтээн  Очирваань бурхан билээ. Шинэ зуунд  Очирваань шүтээнээ бүтээн залах олон түмнийхээ хүсэл, санаачилгыг дэмжиж Монгол Улсын Ерөнхийлөгч зарлигаа гаргасныг улс аймгаараа хурайлан дэмжиж, хүн бүр хувь хандиваа оруулах хөдөлгөөн өрнөсөн. Өргөн олныхоо өглөг буяны ач тусаар үндэсний их шүтээн Богд  Очирваань бурханаа шүтээн урлалын тиг ёсны дагуу монголын уламжлалт зээгт наамлын арга технологид үндэслэн, эд эрдэнийн дээдээр урлан бүтээж, бүх нийтээр ёслон залсан нь энэхүү “хотлыг баригч” шороон хулгана жилийн шашин соёлын онцлог үйл явдлын нэгэн боллоо. Дээдийн шүтээнээ урлан бүтээхэд уламжлалт урлахуй ухааны эрдэм авъяастнууд, манай улсын аймаг, нийслэл бүрийн болон Буриад, Халимаг, Өвөрмонголыг төлөөлсөн уран үйлчид хамтран оролцсон нь монголчуудын эв нэгдлийг батлан илэрхийлэв. Үндэсний эв нэгдэл, эрч хүч, эрдэм чадлын их шүтээн Богд  Очирваань бурханыг бүтээн залахад бие, хэл, сэтгэлийн угаас шамдал зүтгэл гаргаж, бодитой тус нэмэр оруулсанд талархаж, Монгол Улсын Ерөнхийлөгчийн зарлигийн хэрэгжилтийг хангахад идэвхийлэн дэмжиж ажилласанд танд дурсган хадгалуулав.Таны санаж сэдсэн сайн үйл бүхнийг  Очирваань бурхан ямагт ивээх болтугай” гэж өгүүлсэн байна.

Энэ өдөр Ерөнхийлөгчийн батламжийг Б.Бат-Эрдэнэ, Д.Чойжамц, С.Цэдэндамба, Л.Лхагва, Ч.Дамбажав, Д.Нацагдорж, Г.Пүрэвбат, Н.Болормаа, А.Шагдарсүрэн, Ц.Гарамжав, В.Доржготов, Д.Үржинлхам, Б.Цэрмаа, Г.Жигжидсүрэн, Ч.Амарсайхан нар болон Монгол банк, Хаан банк, УБТЗ зэрэг хувь хүн албан байгууллагын төлөөлөл гардан авлаа.

Монгол Улсын Ерөнхийлөгчийн ХМА-аас мэдээлэв.