-19 дэх удаагийн Евроазийн эдийн засгийн дээд хэмжээний уулзалтаас-

БНТУ-ын Истанбул хотод Евроазийн эдийн засгийн дээд хэмжээний уулзалт болж өнгөрлөө.  Энэ уулзалтад Монголын энх тайван найрамдлын байгууллагын төлөөлөгчид жил бүр урилгаар оролцдог уламжлалтай.

Энэ жил Монголын энхтайван, найрамдлын байгууллагын ерөнхийлөгч Д.Загджав тэргүүтэй төлөөлөгчид оролцсон юм.

Дээд хэмжээний уулзалтын үеэр Монголын энх тайван, найрамдлын байгууллага, Туркийн Мармара сантай хамтран ажиллах санамж бичиг байгууллаа. Ингэснээр ижил чиглэлд үйл ажиллагаа явуулдаг энэ хоёр байгууллага цаашид илүү өргөн хүрээнд хамтран ажиллах боломж нээгдэж байгааг Д.Загджав ерөнхийлөгч онцлов.

Туркийн Мармара групп сан Евроазийн эдийн засгийн дээд хэмжээний уулзалтыг 19 жил алгасалгүй зохион байгууллаа. Тус сан ААН-үүд болон төрөөс санхүүгийн дэмжлэг авдаг бөгөөд олон улсын талбарт ажилладаг, томоохон ТББ юм байна. Тэд 1985 оноос хойш энх тайвны чиглэлээр үйл ажиллагаа явуулж, Туркийн нийгэм, эдийн засгийн амьдралд үүссэн асуудалд шийдэл олох, эрх баригчдад нөлөөлөх зорилгоор олон нийтийн дунд үйл ажиллагаа зохион байгуулдаг байна.          

Санамж бичигт гарын үсэг зурах ёслолд Монгол Улсаас Бүгд Найрамдах Турк улсад суугаа Онц бөгөөд Бүрэн эрхт Элчин сайд Б.Батхишиг, Мармара Групп Сангийн Дэд Ерөнхийлөгч Энгин Коклучинар, МЭТНБ-ын Тусгай үүрэг гүйцэтгэгч Нарийн бичгийн дарга Г.Тэнгэр, МЭТНБ-ын Хөрш орнуудын газрын захирал Э.Ундраа, МЭТНБ-ын Хамтын ажиллагааны нэгдүгээр нарийн бичгийн дарга Ч.Заяа нар байлцлаа.