БНАСАУ-ын удирдагч Ким Жон Ун АНУ-ын Ерөнхийлөгч Дональд Трампын Иранд хийсэн цэргийн ажиллагааг “төрөөс ивээн тэтгэсэн терроризм” хэмээн буруушаасан талаар олон улсын хэвлэлүүд мэдээлж байна.

АНУ болон Израилийн зүгээс Иранд цохилт өгсний дараа Пёньян албан ёсны мэдэгдэл гаргаж, уг ажиллагааг “хууль бус түрэмгийлэл”, “гангстер маягийн үйлдэл” гэж тодорхойлсон байна. Түүнчлэн Вашингтоны үйлдлийг бүс нутгийн тогтвортой байдалд ноцтой аюул учруулж байна хэмээн шүүмжилжээ.

Шинжээчдийн үзэж буйгаар, Иранд болсон үйл явдал нь Хойд Солонгосын цөмийн бодлогыг улам бататгах шалтгаан болж байна. Тухайлбал, хэрэв Иран цөмийн зэвсэгтэй байсан бол ийм халдлага гарахгүй байх байсан гэсэн байр суурь Пёньянд хүчтэй яригдаж эхэлжээ. 

Мөн уг нөхцөл байдал нь АНУ, БНАСАУ-ын хоорондын цөмийн хэлэлцээг улам холдуулж, Ким Жон Ун Трампад итгэх итгэлийг сулруулж болзошгүйг судлаачид анхааруулжээ. 

Ираны асуудлаарх АНУ-ын бодлого болон цэргийн ажиллагаа нь олон улсын харилцаанд шинэ хурцадмал байдал үүсгэж, ялангуяа цөмийн зэвсэгтэй болон зэвсэггүй орнуудын аюулгүй байдлын ойлголтыг өөрчлөхөд нөлөөлж байна гэж ажиглагчид дүгнэжээ.

Эх сурвалж: CNN, Korea Joongang Daily