Ерөнхийлөгчийн санаачилсан УИХ-ын тухай хууль нэмэлт, өөрчлөлт оруулах тухай хууль буюу УИХ-ын гишүүнд ёс зүйн хариуцлага тооцох тухай хуулийн төслийг УИХ-ын нэгдсэн чуулганы хуралдаанаар хэлэлцэх эсэхийг нь хэлэлцлээ. Гишүүд асуулт асууж, санал хэлсний дараа эсрэг байр суурьтай гишүүд үг хэлсэн ч санал хураалт явуулалгүй маргаашийн 10:00 цагт санал хураах болохыг УИХ-ын дарга С.Бямбацогт хэлсэн юм. 

Гэхдээ бид юунд эргэлзсэн бэ гэхээр МАН-ын дотоод зодооноос болоод намын даргадаа эрх мэдэл төвлөрүүлэх гэсэн оролдлого чинь сүүлдээ УИХ дахь цөөнхийг байхгүй болгох гэж байна

Хуралдааны төгсгөлд УИХ-ын гишүүн Х.Тэмүүжин байр сууриа илэрхийллээ. Тэрбээр "Яг өнөөдрөөс эхлээд цөөнхийг байхгүй болтол нь хүчирхийлэх гэж байгаа юм уу. Бүлэгт ямар ч нөхцөлд завсарлага авахтай холбоотой үг хэлэх эрх бий. Яагаад бүлэг үг хэлэх хэрэгцээ байгаа вэ гэхээр би хувь хүний хувьд Ерөнхийлөгчийн санаачилсан хуулийг дэмжиж байгаа. Гэхдээ хэлэлцүүлэг хийх журам чинь болохгүй байна. Монгол Улсын Их Хуралд байгаа 42 гишүүнтэй бүлэгт энэ хуулийн төсөл орж ирсэнгүй, танилцуулагдсангүй. Бидэнд ярих боломж олгосонгүй. Бид нэг шийдвэр гаргахын тулд мэдээлэл авах хэрэгтэй байсан. 

УИХ-ын гишүүн хуралдаа суухгүй байна, шийдвэр гаргалтад оролцохгүй байна, парламентын эрх доголдож байгаа гэдэг зөв. Ерөнхийлөгчийн энэ саналыг дэмжиж байна. Гэхдээ бид юунд эргэлзсэн бэ гэхээр МАН-ын дотоод зодооноос болоод намын даргадаа эрх мэдэл төвлөрүүлэх гэсэн оролдлого чинь сүүлдээ УИХ дахь цөөнхийг байхгүй болгох гэж байна. Юу ёс зүй мөн эсэхийг та нар олонхоороо шийднэ. Цөөнхийн таалагдахгүй байгаа үйлдэл бүрийг ёс зүйн ноцтой алдаа гэж үзнэ. Цөөнхийг дуртай үедээ бүрэн эрхийг түдгэлзүүлнэ гэж олонхоор шийдвэр гарах гэж байгаа юм. Парламентын олонход ийм эрх байдаггүй юм. Хэмжигдэхгүй зүйлээр хэн нэгнийг зайлуулна гэдэг бол болохгүй.

Бид олон намын тогтолцоотой парламентыг парламентаар нь байлгах ёстой.

Яагаад парламентын олонх олонхын намын даргад эрх мэдлийг төвлөрүүлэх гэж байгаа юм. Та нар намын дотоод зодооноо Үндсэн хуулийн дэг журам, парламентын ардчиллаар тоглож шийдэж болохгүй. Парламентын гишүүн ажилдаа ирэхгүй байна, манай намд ч тийм хүн бий. Хариуцлага тооцох ёстой. Зөв. Гэхдээ олсны үзүүрт үхэр гэдэг шиг намынхаа даргад эрх мэдэл төвлөрүүлж, дараа нь цөөнх рүүгээ орно шүү дээ. АН байнга цөөнх болохгүй. Дараа нь та нарт үйлчилнэ. Ёс зүйн зөрчсөн гээд нэг нэгээр нь жиргэнэ шүү дээ. Бид олон намын тогтолцоотой парламентыг парламентаар нь байлгах ёстой.

М.Нарантуяа гээд гишүүн 8.3 хувийн саналаар УИХ-ын гишүүн болсон. 92 хувь нь дэмжээгүй. Гудамжинд энэ хүний ярьсан болгоныг 92 хувь нь эсэргүүцэж байгаа ч цөөнхийн дуу хоолойг 92 хувь нь боож болохгүй шүү дээ. Та бүхэн 36 хувийн саналаар УИХ-д орж ирсэн" гэсэн юм.