АНУ-ын ерөнхийлөгч Дональд Трамп Ирантай "аль болох хурдан" тохиролцоонд хүрвэл тус улсын эсрэг хийхээр төлөвлөсөн довтолгоогоо цуцална гэж мэдэгдлээ.

Тэрбээр цахим хуудастаа Иран болон Ойрх Дорнодын бүс нутгийн бусад орнууд АНУ-аас цэргийн ажиллагаагаа түр хойшлуулахыг хүссэн бөгөөд хэлэлцээрийн үндсэн нөхцөлүүд дээр тохиролцсон гэж мэдэгджээ. 

Трамп Ирантай хэлэлцээ хийх нь Ормузын хоолойг эргэн нээж, Ираны цөмийн хөтөлбөрийн аюул заналхийллийг зогсоох түлхүүр гэдгийг онцолсоор буй. 

Гэвч Ираны төрийн мэдээллийн агентлаг Трампын мэдэгдлийг үгүйсгэж, Тегеран АНУ-аас цэргийн ажиллагаагаа хойшлуулах хүсэлт гаргаагүй бөгөөд энэ нь "ээлжит худал мэдэгдэл" гэсэн байна.

Трамп сэтгүүлчдэд Ирантай хийх хэлэлцээ даваа гарагийн үдээс хойш эхэлнэ гэснээс өөр дэлгэрэнгүй мэдээлэл өгөөгүй аж. 

Түүний хувьд өмнө нь буюу дөрөвдүгээр сард Ираны талыг хэлэлцээний ширээний ард суухгүй бол Ираныг бүхэлд нь сүйрүүлнэ хэмээн анхааруулж байв. 

Мөн Ираны иргэний дэд бүтэц, цахилгаан станцуудыг устгана гэж сүрдүүлсэн бөгөөд олон улсын шинжээчид ийм үйлдлийг дайны гэмт хэрэгт тооцогдож болзошгүй гэж шүүмжилж байсан юм.

Гэхдээ уг мэдэгдлийн дараа АНУ-ын дэд ерөнхийлөгч Жей Ди Вэнс тэргүүтэй төлөөлөгчид Пакистанд Ираны талтай нүүр тулсан хэлэлцээ хийж байв.

Эх сурвалж: ВВС