Өнөөдөр Эрүүл мэндийн хөгжлийн Үндэсний төв дээр “Эмийн бүртгэл мэдээллийн үйл ажиллагааг сурталчлах” өдөрлөг зохиогдлоо.

Манай улсад нийт 1700 нэрийн эм бүртгэгджээ. 2007 онд гэхэд л 170 нэрийн эм шинээр бүртгэгдсэн байна. Нийт эмийн бүтээгдэхүүний 94 хувийг импортоор авч ердөө 6 хувийг нь дотоодын эмийн үйлдвэрүүд хангадаг. Гэсэн атлаа манай улсад эмийн үйлдвэр 33 байдаг гэнэ.

Аливаа эмийг эмчийн заавраар тунг нь тааруулж хэрэглэж гэмээ нь сая эм гэсэн утгаа агуулдаг. Харин тунг нь хэтрүүлж дур мэдэн хэрэглэх аваас ямар ч эм хор болон хувирах учиртай. Жишээлэхэд сүүлийн үед парацетомолтой эмийг их тунгаар ууж хэрэглэхгүй байхыг Дэлхийн эрүүл мэндийн байгууллагаас анхааруулах болжээ. Учир нь тунг нь хэтрүүлж хэрэглэвэл энэ эм нь элгийг хатууруулах муу нөлөөтэй байдаг гэнэ.

Зарим антибиотикийг жирэмсэн үед хэрэглэх нь ургийн хөгжилд сөрөг нелөө үзүүлдэг. Жишээ нь, тетрациклин нь шүд, ясанд нөлөөлдөг бол гентамицин, стрептомицин зэрэг нь сонсголд нөлөөлж дүлий болгоход хүргэдэг. Нянгийн эсрэг үйлчилгээтэй нитрофураны бүлгийн эмүүд (фурагин, фурадонин, фуразолидон) ургийн шарлалт хэвийнхээс илүү болоход нөлөөлдөг. Энэ бүгд нь эмийн зохисгүй хэрэглээ урагт ямар нэг байдлаар нөлөөлж гажигтай хүүхэд төрүүлдгийн жишээ юм. Түүнчлэн гентомицин гэх тариаг хэт удаан хугацаанд их хэмжээгээр хэрэглэвэл сонсгол муудаж, дүлийрэх хүртлээ муу нөлөөтэй байдаг. Тиймээс аливаа эмийг хэрэглэхдээ эмчийн зааврын дагуу, зөв зохистой хэрэглэх нь хамгаас чухал юм.

М.Жаргал