УИХ-ын ээлжит чуулганы үеэр Хот байгуулалт, барилга орон сууцжуулалтын сайд Э.Бат-Амгалан түрээслээд өмчлөх орон сууц буюу "Солонго 1,2" төслийн талаар мэдээлэл өглөө. 

Тэрбээр "Солонго 1,2" төсөл нь анх удаа төр, хувийн хэвшил хамтарсан, нөхцөлт зээлээр олгогдож буй орон сууцны төсөл юм.

Төслийн сонгон шалгаруулалтыг аравдугаар сарын 10-аас эхлэн 14 хоногийн хугацаанд цахимаар хийнэ. Иргэдийн мэдээллийг хүлээн авсны дараа 100 онооноос уралдуулан тооцно. Жишээлбэл, хоёр иргэний материал дээр цахим систем ажиллаж аль илүү боломжтойг нь шалгаруулна. Тиймээс хүний нөлөө орохгүй. 

Уг байрны нэг мкв-ийн үнэлгээг 4.428.000 төгрөг гэж тогтоосон" гэлээ. 

Түрээслэгч орон сууцныхаа түрээсийг тав хүртэлх жилийн хугацаанд төлөхөөс гадна нэмэлт төлбөр төлж урьдчилгаа бүрдүүлнэ. Орон сууцны нийт үнийн дүнгийн 30 хувийг төлсөн тохиолдолд зээлд хамрагдах боломжтой. Жишээлбэл, иргэн 45 м.кв 199,260,000 сая төгрөгийн үнэтэй орон сууцанд таван жил оршин суух хугацаандаа 59,778,000 төгрөгийн урьдчилгаа цуглуулна. 

Урьдчилгаан дээр нэмээд сар бүрийн түрээсээ төлнө. Улаанбаатар хотын хөдөлмөрийн хөлсний доод хэмжээг 1.5-2 хувиар тооцож, зохих журмуудыг тусгаж шинэчилсэн. Түрээсийн орон сууцны үнийг  нэг м.кв тутамд 11,000-15,000 төгрөг байхаар зохицуулжээ. Өөрөөр хэлбэл, 42 м.кв орон сууцыг 462,000-780,000 төгрөгөөр түрээслэх юм.

Байр түрээслэнгээ, урьдчилгааг нь таван жилийн хугацаанд төлбөл орон сууцны зээлд хамрагдана. Уг байрыг түрээслэх түрээслэгчид тавигдах шаардлага, бүрдүүлэх материал зэрэг мэдээллийг ЭНД даран хүлээн авна уу.