УИХ-ын 126 гишүүнээс 75 гишүүн буюу 59.9 хувийн ирц бүрдэж УИХ-ын чуулганы есдүгээр сарын 22-ны хуралдаан үргэлжилж байна. 

УИХ-ын гишүүн С.Амарсайхан: Хууль зүйн салбар бол шуурч бас шуугьж болдоггүй хэцүү салбар. Зөв хүн томилогдлоо гэж харж байна. Хөрөнгө чинээтэй, эрх мэдэлтэй этгээдүүд элдвээр нөлөөлж, барьцаалах гэж оролдоно. Ерөнхий сайдын хэлж байгаа шиг юунд чинь ч оролцохгүй гэдэг худлаа. Бүх талаар оролдоно. Үгэнд нь орж худалдагдаад, өргөл барьцыг нь аваад өөрсдийнх нь талд орсон бол "Та хамгийн сайн сайд" болно. Харин зарчимтай, хууль шаардаж, зарим нэг сүлжээнд орж ялзарсан этгээдүүдтэй нийлэхгүй явбал та яаж ч гүтгэгдэнэ. Үүнийг би биеэрээ амссан хүн. Эхлээд нэр төрөөр чинь оролдоно. Дараа нь үр хүүхдүүдээр чинь барьцаалж оролдоно. Тэгээд элдэв янзын бичлэг хийнэ. Бүр болохгүй бол Төрийн цэргийн байгууллага, хууль сахиулах байгууллагаар хэвлэлийн хурал хийж байгаад цаазын тавцанд аваачна. 

Хуулийн байгууллага тэр дундаа цагдаа, шүүхийн шийдвэр дампуурсан. Ажил хийж байгаа хүмүүс нь энгийн алба хаагчид 10, 20 мянгаараа бий. Харин тэдний нуруун дээр гэмт бүлэглэлийн этгээдүүд байна. Хар тамхи, хууль бус алт олборлолт, хулгай дээрэм зохион байгуулалттай гэмт хэрэг бүгдийг нь хийдэг нөхөд бий. 

Ард иргэдийг хууль бусаар мөрддөг. Иргэдийн ирсэн гомдлоор шалгалт оруулах гэхээр амь тавьж буйг хараарай. Ял шийтгүүлж байсан этгээдүүдээс бүрдсэн алба байгуулж төсвийн мөнгөөр цалинжуулж алба байгуулсан. Ард нь хэн байгааг та бүхэн мэднэ. Хяналт шалгалтын түр хороо байгуулж сонсгол зохион байгуулан улс орны ирээдүйг баллаж байгаа асуудалтай цаг алдалгүй тэмцээрэй гэж хүсэж байна. 

УИХ-ын гишүүн Р.Эрдэнэбүрэн: Эрх барьж буй МАН-ын удаа дараа үнэмлэхүй ялсан, олон жил сөрөг хүчингүй байсны зовлонг үүрч хүнд хэцүү нөхцөлд орсон байна. Хоорондоо зодолдох зуураа маш олон гэмт хэрэг авлига, хулгай ярьсан. Ард иргэд хариуцлага хүлээж, нийгмээ цэвэрлээч гэсэн өндөр хүлээлттэй байна. Хэрвээ шинэ сайд эдгээр бугшсан асуудлыг шийдвэрлэж чадахгүй бол чаддаг хүмүүст нь ажлаа өгөөд их хурал тарахаас өөр аргагүй болж байна. 

Эдийн засаг өсөж, уул уурхайн салбараас их орлого олоод байгаа мөртөө өрхийн орлого эсрэгээрээ буурсан үзүүлэлт байна. Уг гажуудлыг засаж чадахгүй бол эдийн засаг өсөөд ч нэмэргүй байна. Тиймээс Хууль зүйн яам хэрэгжихгүй байгаа хуулиа мониторинг хийх хэрэгтэй.

УИХ-ын гишүүн Г.Тэмүүлэн: Хууль зүйн салбарт нийгмийн үнэт зүйл, шударга ёсыг бэхжүүлэхтэй холбоотой хүлээлт өндөр байна. Эдийн засагтай холбоотой асуудал дээр зарчмын хувьд байр суурь нэг байна. Хувийн хэвшлийн эрх зүйн орчныг сайжруулахад анхаарна. Нийгэм, эдийн засгийн татварын бодлогын тухай хуулийг дахин анхаарна. Төсвийн болон татварын суурь шинэчлэлийг хийнэ.