Шударга өрсөлдөөн хэрэглэгчийн төлөө газар БНХАУ-ын ӨМӨЗО-ны Үйлдвэр худалдааны Засаг захиргааны товчоотой хуулийн хүрээнд хамтран ажиллаж, “Монголд үйлдвэрлэв” гэсэн хуурамч шошготой бараа бүтээгдэхүүнийг хилээр оруулахгүй байх, таслан зогсоох, хяналт арга хэмжээг авна.

Хоёр тал хэрэглэгчийн эрхийг хамгаалах талаар сургалт, сурталчилгаа явуулах, Өрсөлдөөний хуулийн хэрэгжилтийг хангахад туршлага, мэдээлэл солилцох, харилцан дэмжлэг үзүүлэх, хилийн боомт орчмын нутагт хэрэглэгчийн эрхийг хамгаалах болон Өрсөлдөөний хуулийг хэрэгжүүлэх ажлыг харилцан уялдуулах, хуурамч бараа бүтээгдэхүүний хяналтыг сайжруулж, таслан зогсоох асуудлыг шийдвэрлэхээр тохиролцсон байна.

Хамтын ажиллагааны үр дүнд хоёр орны иргэд, хэрэглэгчдийн эрх ашиг зөрчигдөхгүй байх, аж ахуй эрхлэгчид шударгаар өрсөлдөх боломж бүрдэнэ.

Иймээс урд хөршид Монгол иргэд бараа бүтээгдэхүүн худалдан авах, ажил үйлчилгээ авах, гүйцэтгүүлэх явцад эрх ашиг нь зөрчигдсөн тохиолдолд Үйлдвэр худалдааны Засаг захиргааны товчооноос шуурхай шалгаж, тухай бүр хохирлыг барагдуулж байхаар тохирчээ. Мөн Монгол улсын зах зээл дээр борлуулагдаж байгаа, хэрэглэгчдийг төөрөгдүүлж байж болзошгүй бараа бүтээгдэхүүн, техник тоног төхөөрөмжийн талаарх үнэн бодит мэдээллээр хангахаар болсон байна.

Хамтын ажиллагааны үр дүнд хоёр орны иргэд, хэрэглэгчдийн эрх ашиг зөрчигдөхгүй байх, аж ахуй эрхлэгчид шударгаар өрсөлдөх боломж бүрдэх юм.

Үйлдвэр худалдааны Засаг захиргааны товчоо нь Шударга худалдаа, хэрэглэгчийн эрхийг хамгаалах, зах зээлийн зохицуулалт, хүнсний хангамжийн хяналт, аж ахуйн нэгжийн бүртгэл, барааны шошго тэмдэгтийн хяналт, зар сурталчилгааны хяналтыг хэрэгжүүлдэг, 18 салбар хэлтэс, 11,000 ажилтантай аж.