Японы аялал жуулчлалын төв болох Нара хотын иргэн Хидетоши Мацукава хуванцар "гялгар" уутыг орлуулахаар будааны хивэг, сүүний хайрцгаар уут хийжээ. Ингэх шалтгаан нь Нара хотын гудмаар чөлөөтэй зорчин, амьдардаг "бэлгэдлийн" бугуудыг хамгаалах зорилготой аж. 

Үндэсний байгалийн үнэт зүйл хэмээн хамгаалдаг бэлгэдлийн 1000 орчим буга тус хотод байдаг ба жуулчдын өгсөн хоол, амттаныг идэх дуртай аж. Харин 2019 оны долоодугаар сард үхсэн есөн буга олдсон ба гэдэс дотроос нь хуванцар уут гарчээ.

Иймд Мацукава бэлгэдлийн бугуудыг хамгаалахын тулд уутны шинэ шийдэл олохоор зорьжээ. Тэрээр орон нутгийн цаас үйлдвэрлэгч компанитай хамтран "Шикагами буюу бугын цаас" хэмээх цаасыг будааны хаягдал хивэг, сүүний цаасан хайрцгаар хийсэн байна.

Мацукава "Цагаан будааг цайруулахад хивэг нь хаягддаг болохыг олж мэдсэн. Тиймээс энэ цаас давхар хог хаягдлыг бууруулна" хэмээсэн бөгөөд бугын цаас хүний биед хоргүй гэдгийг туршилтаар баталжээ. Тэрээр "Бид энэ цаасыг бугад хоргүй гэдгийг батлаагүй ч хүний биед хоргүй учраас тэдэнд ч мөн адилхан байх гэж найдаж байна" гэв.

Нара хотын сүм болон банкнууд 4000-5000 бугын уутыг худалдаж авсан бөгөөд цаашид хот даяар хуванцар уутыг бугын уутаар солихыг мөрөөдөж буйгаа Мацукава хэлсэн юм.

Эх сурвалж: CNN