Улсын нэгдсэн төсвийн тэнцвэржүүлсэн орлого, тусламжийн нийт хэмжээ 2016 оны эхний улиралд 1095 тэрбум төгрөгт хүрчээ.

Зарлага, эргэж төлөгдөх цэвэр зээлийн нийт хэмжээ 1710 тэрбум төг болж, улсын нэгдсэн төсвийн тэнцвэржүүлсэн нийт тэнцэл 615.7 тэрбум төгрөгийн алдагдалтай гарлаа. Дөнгөж эхний улирлын дүнгээр ийм өндөр алдагдал хүлээсэн төсөв оны эцэс гэхэд их наядаас илүү ч алдагдал хүлээж мэдэх юм.

Улсын нэгдсэн төсвийн алдагдал өмнөх оны мөн үеийнхээс 471 тэрбум төгрөгөөр өсөхөд орлого 10.8 хувиар буурч, зарлага 24.6 хувиар нэмэгдсэн нь нөлөөлжээ.

Татварын нийт орлого өмнөх оны мөн үеийнхээс 120.0 тэрбум төг буюу 11.0 хувиар буурахад

• Бусад татвар, төлбөр хураамжийн орлого 100.6 тэрбум төг буюу 52.8 хувь,
• Орлогын албан татварын орлого 73.1 тэрбум төг буюу 29.2 хувиар буурсан нь голлон нөлөөлжээ.

Гэхдээ нийгмийн даатгалын орлого, хөрөнгийн албан татвар, нэмэгдсэн өртгийн албан татвар, онцгой албан татвар 2.4-36.0 тэрбум төг буюу 1.9-48.9 хувиар өссөн аж.

Улсын нэгдсэн төсвийн орлогын

• 88.8 хувийг татварын орлого,
• 11.2 хувийг татварын бус орлого эзэлж, өмнөх оны мөн үеийнхээс татварын орлого болон татварын бус орлогынх 0.1 пунктээр тус бүр өсчээ.

Улсын нэгдсэн төсвийн зарлага, эргэж төлөгдөх цэвэр зээлийн нийт хэмжээ 2016 оны эхний улиралд 1710 тэрбум төгрөг болсныг танилцуулсан. Ингэж өмнөх оны мөн үеийнхээс 24.6 хувиар өсөхөд

• Урсгал зардал 187.2 тэрбум төг буюу 15.1 хувь,
• Хөрөнгийн зардал 134.3 тэрбум төг буюу 2 дахин,
• Урсгал шилжүүлэг 48.1 тэрбум төг буюу 9.3 хувиар нэмэгдсэн нь нөлөөлсөн байна.

Эх сурвалж: Улсын бүртгэл, статистикийн ерөнхий газар