35 ММ-ИЙН ДУРАНД: Дахин төлөвлөлт нэртэй "дутуу төлөвлөлт"

Улаанбаатарын төвийн бүсэд өнгөрсөн ба өнөө цаг нэгэн гудамжинд зэрэгцэн харагдана. Олон арван жилийн түүхтэй нам давхар барилгуудын дэргэд шилэн фасадтай өндөр барилгууд сүндэрлэж, зарим хэсэгт шинэ бүтээн байгуулалтын ажил үргэлжилж байна.

Гэрэл зургуудаас хуучин сууцнуудын фасад, тагт, цонх, шатны хэсэг цаг хугацааны элэгдэлд орсныг харж болно. Ийм барилгуудыг шинэчилж, иргэдийн амьдрах нөхцөлийг сайжруулах шаардлага Улаанбаатар хотод бодитоор бий.

Гэвч хуучин барилгыг буулгаж, оронд нь өндөр барилга барих нь дахин төлөвлөлтийн зөвхөн нэг хэсэг. Зургаас харахад намхан хуучин барилгуудын дунд өндөр барилгууд нэмэгдэж, барилгажилтын нягтаршил эрчимжиж байна. Үүний цаана зөвхөн шинэ орон сууцны асуудал бус, сургууль, цэцэрлэг, авто зогсоол, зам талбай, ногоон байгууламж, инженерийн дэд бүтэц зэрэг дагалдах хэрэгцээ хэрхэн шийдэгдэж байгаа нь чухал.

Шинэ барилга баригдлаа гэхэд тэнд амьдрах айл өрхийн тоо нэмэгдэнэ. Харин хүүхдүүд нь хаана сурч, хаана цэцэрлэгт хамрагдах вэ? Нэмэгдсэн автомашинууд хаана зогсох вэ? Өдөр тутмын хөдөлгөөн нэмэгдэхэд зам, орц гарц нь ачааллаа даах уу? Өмнө нь байсан ногоон болон нийтийн эзэмшлийн талбай ямар хэмжээнд үлдэх вэ?

Эдгээр асуудлыг хамтад нь шийдэхгүйгээр зөвхөн барилгажилтыг нэмэгдүүлэх нь “шинэчилсэн төлөвлөлт” гэхээсээ илүү “чигжсэн төлөвлөлт” болох эрсдэлтэй.

Өөрөөр хэлбэл, хуучин байр шинэчлэгдэж байгаа нь сайн. Харин шинэчлэл нь оршин суугчдын амьдрах орчныг бүхэлд нь сайжруулах ёстой. Барилга нь шинэ боловч сургууль, цэцэрлэг, зогсоол, зам, ногоон байгууламж нь хүрэлцээгүй хэвээр үлдвэл иргэдийн хувьд асуудал арилсан биш, хэлбэрээ өөрчилсөн хэрэг болно.

Дахин төлөвлөлтийн гол хэмжүүр нь хэдэн шинэ барилга барьсан бэ гэдгээр бус, тэнд амьдрах иргэдийн орчин хэрхэн өөрчлөгдөв гэдэгт байх ёстой.

Улаанбаатарын төвийн бүсийн хуучин орон сууц, барилга байгууламжийн дундах шинэ бүтээн байгуулалт, дахин төлөвлөлтийн дүр зургийг харуулав. 

Нийтлэлийг сэтгүүлч: М.Ариунзаяа.