Гэр бүл, хөдөлмөр, нийгмийн хамгааллын яам Азийн хөгжлийн банкны буцалтгүй тусламжаар “Ахмад настны асрамж үйлчилгээний тогтолцоог хөгжүүлэх төсөл”-ийг 2026-2029 оны хооронд хэрэгжүүлнэ.

Төслийн бэлтгэл ажлын хүрээнд Азийн хөгжлийн банкны Хүний болон Нийгмийн хөгжлийн секторын газрын Эрүүл мэндийн мэргэжилтэн Жей Кьюн Ким манай улсад ажиллалаа.

Тэрбээр Гэр бүл, хөдөлмөр, нийгмийн хамгааллын дэд сайд Б.Солонгоо болон Сангийн яам, Эрүүл мэндийн яам, холбогдох удирдлагуудтай уулзаж, төслийн бэлтгэл ажил, явцын талаар санал солилцов. Төслийн хүрээнд дараах  үйл ажиллагааг хэрэгжүүлэх юм.

• Ахмад настны урт хугацааны асаргаа үйлчилгээний хүртээмж, чанарыг сайжруулах
• Ахмад настны урт хугацааны асаргаа үйлчилгээний эрх зүй, бодлого, санхүүжилтийн орчныг сайжруулах
• Ахмад настны урт хугацааны асаргаа үйлчилгээ үзүүлж байгаа байгууллагын тоног төхөөрөмж, хүний нөөцийн чадавхыг бэхжүүлэх.  

Гэр бүл, хөдөлмөр, нийгмийн хамгааллын дэд сайд Б.Солонгоо энэ төсөл нь манай улсад ахмад  настны урт хугацааны тусламж, үйлчилгээний үр дүнтэй тогтолцоо бий болох, эрх зүйн орчинг сайжруулахад чухал ач холбогдолтой бөгөөд яамны зүгээс идэвх, санаачилгатай,  бүхий л талаар хамтран ажиллахаа илэрхийлэв. 

Мөн төслийн хүрээнд төрөлжсөн асрамжийн үйлчилгээ үзүүлж байгаа улс, орон нутгийн асрамжийн газруудад дэмжлэг үзүүлэхэд анхаарах, үйлчилгээ үзүүлж байгаа төр,  хувийн хэвшлийн байгууллагуудын мэдээллийн нэгдсэн сан бүрдүүлэх, байгууллагуудын үйлчилгээ, тайлагналт, хяналт, санхүүжилтийн процессыг цахимжуулах, үр дүнг сайжруулах шаардлагатай байгааг онцлов.

Эх сурвалж: Гэр бүл, хөдөлмөр, нийгмийн хамгааллын яам