Үүрэг даалгаврын явцын талаар Усны газрын дарга З.Батбаяр өнөөдөр /2026.03.26/ Ерөнхий сайдад мэдээллээ. “Оюу толгой” ХХК-ийн зүгээс хаягдал усны дүгнэлт гаргуулах, усны аудит хийлгэх тухай албан бичгийг Усны газарт ирүүлсэн талаар мэдээлэв. 

Энэ дагуу усны аудитын ажлын даалгаварт Усны газар саналаа тусгуулахаар ажиллаж байгаа юм байна. Харин ус бохирдуулсны төлбөр авах тухайд тус компани хаягдал усны дүгнэлт гаргуулахаа илэрхийлсэн нь тодорхой хэмжээний ахиц мөн гэж Усны газрын дарга З.Батбаяр хэллээ. 

Гэхдээ тус компаниас ус бохирдуулсны төлбөрийг энэ жилээс тооцож авах биш 2020 оноос хойш бохирдуулсан усыг тооцож, төлбөрийг нөхөн авна гэсэн Ерөнхий сайдын байр суурийг хатуу хамгаална гэж илэрхийллээ. 

“Оюу толгой” ХХК ус бохирдуулсны төлбөр төлөхгүй, нийгмийн хариуцлагаа ухамсарлахгүй байгаа тохиолдолд тус компанид ус ашиглуулахгүй байх асуудлыг судалж танилцуулахыг Ерөнхий сайд Г.Занданшатар Усны газарт даалгав. 

Ус бохирдуулагч нь төлөгч гэсэн олон улсын нийтлэг зарчмыг хангуулахад ус хамгийн их ашиглаж, бохирдуулдаг аж ахуйн нэгжүүдийн манлайлал нэн чухал. Бохирдуулагч бүр төлөгч болсноор усаа хэмнэх, байгальд ээлтэй технологид хөрөнгө оруулалт хийх зэрэг олон талын ач холбогдолтойг Ерөнхий сайд Г.Занданшатар онцлов.  

Үндсэн хуулийн 6.2-д зааснаар ус бол төрийн нийтийн өмч учраас усны асуудал хариуцсан төрийн байгууллага ус ашиглуулах эсэхийг шийдэх бүрэн эрхтэй гэж Усны газрын дарга З.Батбаяр хэллээ.

Тэгвэл "Оюу толгой" үйлдвэр орон нутгийн иргэдийн ундны усны эх үүсвэрээс тусдаа буюу газрын гадаргаас доош 150-400м гүнд байдаг эх үүсвэрээс усаа татаж хэрэглэдэг, 87 хувийг дахин ашигладаг гэж энэ сарын 20-нд Нүүр номдоо мэдээлжээ.

Мөн Монгол Улсын хууль тогтоомж, холбогдох гэрээнд заасны дагуу ус ашигласны төлбөрөө бүрэн төлдөг. 2025 онд 23.9 тэрбум төгрөг 2013 оноос хойш нийт 218 тэрбум төгрөгийг ус ашигласны төлбөрт төлсөн гэв.