Сирийн нийслэл Дамаскийн хоёр дүүргийг Израилийн агаарын хүчин бөмбөгджээ. Үүнтэй холбогдуулан Израилийн эсрэг хориг арга хэмжээ авахыг Сири НҮБ-аас шаардав.

Сирийн Гадаад хэргийн яамны төлөөлөгчид НҮБ-ын Ерөнхий нарийн бичгийн дарга Бан Ги Мүнд шаардах бичиг хүргүүлсэн хэмээн Сирийн мэдээллийн Sana агентлаг дамжууллаа.

Тус шаардах бичигт Израиль улс Сирийн тусгаар тогтнолд заналхийлж, халдлагын улмаас улс оронд материаллаг хохирол учруулсан гэв. Түүнчлэн тус халдлага Сирид үйл ажиллагаа явуулж буй алан хядах бүлэглэлүүдийг дэмжих зорилготой байж магадгүй хэмээн үзэж байна.

Сирийн эрх баригчид тус халдлага терроризмын эсрэг тэмцэхэд саад учруулж чадахгүй. Мөн ийм халдлага дахин гарахаас сэргийлэхийн тулд НҮБ-ын дүрэмд заасны дагуу Израилийн эсрэг хориг арга хэмжээ авахыг шаардаж байгаа юм.

Израилийн агаарын хүчин энэ сарын 7-нд буюу өчигдөр Дамаскийн олон улсын нисэх буудал орчимд болон Сири-Ливаны хилийн ойролцоо орших Ад-Димас хот руу агаарын цохилт өгчээ. Эх сурвалжуудын мэдээлж буйгаар халдлагад өртсөн тус бүс нутгуудад Сирийн армийн зэр зэвсгийн бааз байсан гэнэ.

Израилийн эрх баригчид халдлагын талаар ямар ч мэдээлэл өгөөгүй байна.

Эх сурвалж: ВВС