Булган аймгийн төвийн нэгдүгээр багийн "Балгас" хэмээх газарт иргэн Мандахын хашаанд ятуу шувуу үхсэн. Шувууны томуугийн халдвар авсан байж болзошгүй гэж үзэн шинжилгээнд дээж хүргүүлсэн аж. Энэ талаар УМХГ-ын Гамшигтай тэмцэх хэлтсийн мэргэжилтэн Д.Төрбатаас тодрууллаа.

-Булган аймагт тодорхой бус шалтгаанаар шувуу үхсэн. Улсын мал эмнэлэг, ариун цэврийн төв / УМЭАЦТ/ лабораторид шинжилгээ хийлгэхээр хүргүүлсэн гэсэн. Хариу нь гарсан уу?
-Тодорхой бус шалтгаанаар үхсэн шувууны дээжид УМЭАЦТЛ-д шинжилгээ хийж байгаа. Шинжилгээний хариу хараахан гараагүй байна. Хэзээ гарахыг нь мэдэхгүй байна.

-Шувууны томуу нүүдлийн шувуудаас гэрийн тэжээвэр шувуунд халдварладаг биз дээ?
-Тийм ээ. Ятуу шувуу нь нүүдлийнх биш нутгийн шувуу. Шувууны өсөлт их хурдацтай явагддаг болохоор явж чадахаа байсан ч юм уу аль эсвэл хоол идэж чадахгүй зэрэг ямар нэг шалтгаанаар үхсэн байж болно.

-Энэ өвчин үүсгэгч нь шувуунд байнга хадгалагдаж байдаг. Тийм болохоор нутгийн шувуунаас ч энэ өвчин үүсч болно гэдэг?
-Энэ өвчин үүсгэгч нь нутгийн шувуудад байдаг ч өвчин үүсгэгчийг өдөөгч нь нүүдлийн шувууд байдаг. Тэгээд ч "Шувууны томуу" биш гээд хэлчихмээр л байна. Гэхдээ шинжилгээний хариу гарсан тохиолдолд баттай мэдээ өгнө.