БНТУ-ын Ерөнхийлөгчийн ивээл дор, Туркийн Соёл, Аялал жуулчлалын яамны дэмжлэгтэйгээр жил бүрийн тавдугаар сарын 21-27-ны хооронд “Турк хоолны өдрүүд” арга хэмжээг дэлхий даяар болон Турк Улсад нэгэн зэрэг тэмдэглэдэг.

Уг арга хэмжээгээр Турк үндэстний хоолны эрүүл мэндэд ээлтэй, хог хаягдалгүй болоод эртнээс уламжилж ирсэн тогтвортой байдлыг олон улсын хэмжээнд таниулахыг зорьж байгаа юм. Тогтвортой аялал жуулчлалын хөтөлбөрийг хэрэгжүүлснээрээ Турк Улс нь тогтвортой байдлын хандлагаар Турк хоолыг дэлхийн брэнд болгож байна.

Турк улс энэ жилийн олон улсын хоолны арга хэмжээндээ Туркийн Эгийн бүсийн уламжлалт зоогийг танилцуулж буйгаараа онцлог гэдгийг БНТУ-аас Монгол Улсад суугаа Элчин сайдын гэргий Айла Атеш хэлсэн юм. 
Эгийн бүсийн гал тогоонд 800 гаруй төрөл зүйлийн ургамал ашигладаг тул "ногоон хоол" гэж нэрлэж болно. Тийм ч учраас Эгийн бүсийн зоогт шинэ ногоо, далайн бүтээгдэхүүн өргөн хэрэглэдгээрээ бусдаасаа ялгардаг аж. Эгийн бүс нь Турк улсын баруун хэсэгт орших 90 мянга гаруй хавтгай дөрвөлжин километр газар нутгийг хамарна. 

Турк хоол нь амт чанар, төрөл зүйлийн хувьд баялаг төдийгүй эрүүл тэнцвэртэй хооллолтод тохиромжтой гэдгээрээ мөн онцлог.

Гэрэл зургуудыг Г.Өнөболд