Үндэсний портал GoGo.mn сайтын Э-Ном   булан уншигчдийнхаа талархлыг хүлээн үйл ажиллагаагаа амжилттай явуулсаар байгаа билээ.

Бид Та бүхэндээ “Монголын Лектор төв”-өөс эрхлэн гаргасан “Илтгэх урлаг ба шилдэг илтгэлүүд” хэмээх ээлжит номоо танилцуулж байна.

Сонгодог реторикийн түүх, алдаагүй илтгэх арван санамж, дэлхийн болон Монголын шилдэг илтгэлүүд, тайлбар дүгнэлтийг энэхүү номонд тусгажээ.

Уншигчдын хүсэн хүлээдэг номын нэг байсаар ирсэн энэхүү эмхэтгэл нь олон хүний хүч хөдөлмөр, хариу үл нэхэх халуун сэтгэл шингэсэн, хамтын бүтээл гэдгийг Та бүхэн мэдэх бөлгөө. Энэ номонд “Монголын Лектор төв”-ийн санаачилж явуулсан сургалт, лекц семинарийн шилдэг илтгэл багтсан агаад томоохон соён гэгээрүүлэгч, улстөрч, уран илтгэгчдийн гайхам сургамж, дэлхийн шилдгүүдээс ч сорчилж орууллаа. Энэ номыг нэг талаас нь “Монголын лектор төв”-ийн дөрвөн жилийн ажлын тайлан, тэр дундаа эрхэм зорилгынхоо хүрээнд хийж гүйцэтгэсэн лекцүүдийн түүхэн товчоон гэж ойлгож болно.

Анхны хувилбараас хойш өнгөрсөн хугацаанд олон мянган уншигч санал бодлоо хэлж, цаашид хийж бүтээх урам зориг, хүсэл тэмүүллийг бидэнд өгсөн юм. Уншигч байхгүй, уншсан хүмүүс оюуны дүгнэлтээ хийхгүй, тэдний сэтгэлгээний хэрэгцээг хангахгүй бол тухайн номыг жинхэнэ бүтээл хэмээн үнэлэх боломжгүй юм.

Бидний хувьд “Илтгэх урлаг ба шилдэг илтгэлүүд” номыг Таны оюуны хэрэгцээнд бодит хөрөнгө оруулалт болно хэмээн үзэхийн зэрэгцээ энэхүү үнэлэлтийг хөндлөнгөөс хийж ирсэн уншигчдынхаа өмнөөс танин мэдэхүйн электрон хэлбэр болгон хүргэж байгаадаа баяртай байна. Хүн бүр анхнаасаа төгс төгөлдөр нэгэн байдаггүй. Харин өөрийн сонирхон судалж буй салбартаа алдар нэрээ мандуулсан олон хүний түүх намтар, амжилт дагуулсан үйл хэргийг нь судлах нь тухайн хүний амжилтын эх ундарга байдаг. Иймээс ярианы урлагт суралцаж буй хувь хүн болоод олны өмнө илтгэж чаддаггүй хүн бүрт өдгөө, ухаан бодлоо уран үгээрээ мөнхөлсөн алдартай илтгэгч, суут удирдагчдын илтгэлээ бичиж, бэлтгэн туурвих, олонд амжилттай хүргэх арвин туршлага, арга зүйг судлах шаардлагатай зүй ёсоор гарч ирдэг. Нэг ёсны бусдын мэргэн санааг өөрийн болгон бүтээлчээр ашиглаж сурах нь амжилтын эхлэл байдаг.

“Монголын лектор төв”-ийнхэн ч энэхүү зайлшгүй шаардлагыг үндэслэн энэ чиглэлийн бүтээлийн уншигч олонд хүргэж ирсэн бөгөөд амжилтын төлөө тэмүүлсэн олон мянган залуу ч “Реторик” буюу “Илтгэх урлаг”-ийг шимтэн судалж, энэ чиглэлийн сургалт дамжаанд сууж, сурах бичиг, судалгааны үр дүнг цаг алдалгүй харж, өөрийн үнэ цэнээ бусдад түгээхэд анхаарч байна. Үүний тод жишээ нь, энэ чиглэлийн ном бүтээлийг олноор хэвлэж буй ч, тэр нь суралцах хүсэлд тэмүүлсэн олон түмний эрэлт хэрэгцээг хараахан хангаж чадахгүй байсаар байна.

Бид ч энэхүү хэрэгцээ шаардлагыг үндэслэж, “Илтгэх урлаг ба шилдэг илтгэлүүд” номоо шинэчлэн, электрон хэлбэрээр уншигч таны мутарт хүргэхдээ олон шинэ илтгэлийг, тэр дундаа түүхэн улс төрчид болох Хитлер, Кеннеди, Махатмаа Ганди, Барак Обама нарын шилдэг илтгэлүүдийг нэмээд зогсохгүй хүн төрөлхтөний түүхэнд хамгийн их нөлөө үзүүлсэн илтгэлүүдэд реторикийн үүднээс хийсэн харьцуулсан судалгаа, логик задаргаа, дүгнэлт тайлбарыг давхар хүргэж байна. Мөн олон нийтийн өмнө илтгэх, ятгах, тайлагнах, танилцуулах ур чадварын талаар шилдэг илтгэгчдийн айлдсан сонирхолтой зөвлөгөөг оруулсан болно.

Эрхэм уншигч Та энэхүү номыг электрон хэлбэрээр худалдан авах, түрээслэн уншихыг хүсвэл ЭНД дарж нэвтэрнэ үү.