"15 жилийн дараа гэхэд нөхөр-хөвгүүн гэх ойлголт газар авч, дөч хүрсэн хүүхнүүд банди нарыг нөхрөөрөө сонгодог болно" гэж холливудын оддын сэтгэл зүйч эмч Элизабет Стоун мэдэгдсэн нь дуулиан тариад байна. Эхнэр нь нөхрөөсөө олон эгч байх нь энгийн үзэгдэл болно гэж тэр үзжээ.

"12-15 жилийн дараа 30 гарсан эрчүүдтэй гэрлэх нь тэнэг хэрэг болж хувирна, учир нь 20-той залуус "бэлчиж" байхад" гэж хатагтай Стоун үргэлжлүүлэн ярьжээ. Тэр олон жил холливудын оддын сэтгэл зүйчээр ажиллаж, зовлон жаргалыг нь хуваалцаж яваа нэгэн. "Эхлээд би залуус олон эгч одтой амрагийн харилцаанд ороход нь өөрсдөө од болохыг хүсэж дээ гэж боддог байлаа. Харин сүүлийн үед залуус үнэхээр ахимаг бүсгүйчүүдэд татагдаад байгааг ойлгосон" гэжээ.

Мөн насны зөрүүтэй хосуудад анхаарах хэдэн дүрэм байдгийг ч задалжээ. Хэдэн жилийн дараа холливудын оддоос эх авсан энэхүү хандлага энгийн хүмүүсийн амьдралд ч нэвтэрнэ гэнэ. Ингээд холливудын од хүүхнүүд дөмөгхөн хөвгүүдийг нөхрөөрөө томилсон хэдэн түүхийг хүүрнэе. Доорх хосуудын тухай тайлбарыг Элизабет Стоун өөрөө бичсэн байна.

Мадоннагийн үүрнээс ниссэн бүргэд Гай Ричи
3арим эрчүүд ахимаг насны, нэр алдартай бүсгүйтэй холбоо тогтоох хүсэл нь тэдний бэлэнчлэх, бүх зүйлийг хялбараар олох гэсэн бодолтой холбоотой нь үнэн. Ийм хөвгүүд ээжийнхээ "хөхнөөс хожуу" гарч, насанд хүрсэн ч тэднийхээ халаасанд байсаар байдаг. Эхнэр авахдаа ч тэд ая тухыг илүүтэй харна. Үеийнхээ эрчүүдээс уйдсан юм уу тэдэндээ тэгтлээ таалагдахаа больсон хүүхнүүд иймэрхүү банди нарыг сонгодог.

Ийм хүүхнүүд хөвгүүнээс хүүхэд нэхэхгүй, мөнгө хүлээхгүй, үүрэг хариуцлагаар дарамтлахгүй. Гэвч заримдаа өнөөх хөвгүүн гэнэт хүч чадалтай эр болж, гэр бүлийн эрх дархыг булааж авах нь бий. Тод жишээ нь, Гай Ричи Мадонна хоёрын харилцаа юм. Авьяаслаг хэрнээ арав дүү нөхөртэй байх Мадоннад таалагддаг байж. Заримдаа бүр түүнээс зөвлөгөө авна. Гэтэл нэг өдөр Гай Ричи өөрийнхөө хүч чадлыг мэдэрч, гэр бүлдээ эзэн нь гэдгээ ойлгуулж эхэлсэн. Гэнэтийн ийм өөрчлөлт нь хүүхнүүдийг алмайралд оруулж, хүлээж авах чадваргүй болгодог. Мадонна ч яг ийм байдалд орсон.

Сексийн хэрэгцээ хангагч Хесус Лус
Тэдний насны зөрүү 29. Эхнэр нөхрөөсөө олон эгч гэр бүлийн гол сонирхол секс байх нь олонтаа. 18-25 настай залуусын цусанд дур хүслийн гал асаж, сэрэл мэдрэмжээ барьж яддаг бол энэ насны бүсгүйчүүд дөнгөж сексийн таашаалаас амсаж эхэлдэг. Бүсгүй долоо хоногтоо хоёр л удаа хийхэд хангалттай гэж үзэж байхад залуу өдөр бүр гэж зүтгэнэ. Харин 20 гарч буй залуу 30 гарсан хүүхэн юм уу, 30 дөхөж буй залуу 50 хүрч буй хүүхэн хоёрын хүсэл яг таарах нь бий.

30-35 насыг эмэгтэй хүний сексийн оргил үе гэдэг. Ийм л үед халуухан залуус шаардагддаг аж. Тэгээд ч залуусын хувьд энэ нь цаг зуурын ашигтай, сонирхолтой хичээл болон хувирдаг. Найз нөхөд нь түүнийг магтан сайшаах бол гэр бүлийнх нь юу ч ойлгохгүй үлддэг. Мадонна Хесус Лусыг яг л цэцэрлэгийн хүүхэд асарч байгаа юм шиг халамжилсан. Дижейгийн дамжаанд суулгаж, ашигтай гэрээ байгуулж өгсөн. Гэвч Хесус яг Гай Ричи шиг жигүүр гүйцээд ирэхийн цагт Мадонна түүнээс холдсон юм.

"Цэцэглүүлдэг" жор Ник Кэннон
Залуу нөхөр гэдэг бол нэг талдаа бас сайн жор юм.

Хөвгүүдийн дэргэд буй хүүхнүүд "цэцэглэдэг" гэж сэтгэл зүйчид үздэг. Мэрайя Кэри Ник Кэнноноос 11 эгч. Гэлээ ч дэргэд нь зогсохдоо хамаагүй залуу харагддагийн нууц нөгөө "цэцэглэдэг"-т оршино.

Гэхдээ иймэрхүү харилцаанд сонирхол нэгтэй байх их чухал. Мөн мэдлэг боловсролын түвшин ойрхон байх хэрэгтэй.

Аврагч эхнэр Деми Мур
Хөлөө олохгүй яваа залуус тогтвортой амьдралтай, өөрийн гэсэн үзэл бодолтой эгчтэй таараад тайвширдаг. Гэхдээ туршлага сууж, хорвоог таньж авсаныхаа дараа ахимаг эхнэрээ орхин одох нь олон.

Ийм зан гаргасан хөвгүүд ирээдүйдээ ч амжилт олдоггүй нь нотлогдсон. Учир нь тэд үргэлж аврагч бүсгүйчүүдийн эрэлд хатсан хэвээрээ үлддэг юм. Ийм гэрлэлтийн тод жишээ нь Эштон Катчер, Деми Мур нар.

Ерөнхийлөн командлагчийн үүргийг энд Деми гүйцэтгэдэг. Эштон түүнийг аль эрт хаячйх байсан боловч Деми түүний сонирхлыг бүрэн хуваалцаж чаддаг тул одоо хүртэл хамт байгаа.

Мур хамтдаа ууж, бүжиглэж, тайчиж чадна. Бүр гудамжинд хүртэл шүү. Тэгээд бас гоо сайхны мэс заслын ачаар 15 насаар залуу харагддаг. "Энэ бүхний эцэст тэмдэглэн хэлэх нэг л өгүүлбэр байна. Хамгийн гол нь нас биш, харин харж, мэдэрч буй чинь юм аа" гэж сэтгэл зүйч эмч Стоун өгүүллээ дуусгажээ.

Р.Гэгээ