Дэлхийн эрүүл мэндийн байгууллагын шугамаар хуурамч эм оруулж ирснийг мэргэжлийн хяналтынхан илрүүлсэн тухай мэдээлэл хэвлэл мэдээллийн хэрэгслүүдээр цацагдаж, эмийн зохисгүй хэрэглээтэй Монголчуудад түгшүүрийн дохио хангинуулсан.

Дэлхийн эрүүл мэндийн байгууллагын зүгээс эм, тариа оруулж ирдэггүй хэмээсэн учир Нийслэлийн мэргэжлийн хяналтын газрын Эрүүл мэнд, боловсрол, соёлын хяналтын хэлтсийн дарга Д.Баярболдоос энэ талаар тодруулсан юм.

-ДЭМБ-ын шугамаар БНСУ-ын Инчоны их сургууль, "JCI", "Хьюндэй" байгууллагын хүмүүнлэгийн ажилтнууд 67 төрлийн хуурамч эм оруулж ирснийг мэргэжлийн хяналтынхан илрүүлсэн гэсэн мэдээлэл цацагдсан. Гэтэл ДЭМБ-аас үүнийг ор үндэсгүй гэж байна?
-Энэ талаар ташаа мэдээлэл гаргасан байна билээ. Хүмүүнлэгийн гэхээр л ДЭМБ-ын шугамаар гээд ойлгочих тохиолдол хүмүүсийн дунд элбэг. Гэхдээ ойрын хэдэн сард ийм тохиолдол гараагүй.

-Хуурамч эм оруулж ирэх тохиолдол хэр их байдаг юм бол?
-Хуурамч эм гэдэг өөр асуудал. Хүмүүнлэгийн сайн дурын ажилтнууд зөвшөөрөл, дүгнэлтгүй, баталгаагүй эмнүүд оруулж ирэх нь бий. Манайд сүүлийн үед БНСУ-ын хөрөнгө оруулалттай хүмүүнлэгийн байгууллагууд, шашны сүм олширч байгаа. Тухайн газруудад хүмүүнлэгийн сайн дурын ажилчид, эмч нар ирж, эрүүл мэндийн үзлэг хийн, хүмүүст эм, тариа тараадаг юм билээ.

-Эм, тариануудыг яаж хил давуулаад байна вэ?
-Гаалийнхны анхаарах асуудал. Гэхдээ сүүлийн үед ийм тохиолдол гараагүй.

Р.Сарангоо