Канадын шигшээ баг анхны тоглолтоо хийхийн өмнөх өдөр Торонто хотод зохион байгуулагдах байсан ДАШТ-ий хөгжөөн дэмжигчдийн фестивалийг цаг агаарын таагүй нөхцөлөөс шалтгаалан цуцалж, хүрэлцэн ирсэн хөгжөөн дэмжигчид сэтгэл дундуур үлджээ.

"Аюулгүй байдлыг нэн тэргүүнд тавьж, аянга цахилгаан буух эрсдэлтэй байгаа тул FIFA Fan Festival Toronto арга хэмжээг нүүлгэн шилжүүлж байна" хэмээн зохион байгуулагчид сошиал сүлжээгээр мэдэгдсэн байна.

Цаг агаарын улмаас үүссэн энэхүү саатал нь тэмцээний үйл ажиллагаанд нөлөөлсөн хамгийн сүүлийн тохиолдол болж байгаа бөгөөд хөгжөөн дэмжигчид том дэлгэцээр Мексик болон Өмнөд Африкийн багуудын нээлтийн тоглолтыг үзэж байх үед болсон байна.

Спортын шинжлэх ухааны судлаачдын үзэж байгаагаар Канад, Мексик, АНУ-д зуны улиралд зохион байгуулагдаж буй ДАШТ нь цаг агаартай холбоотой тодорхой эрсдлүүдтэй тулгарч байгаа аж. Улирлын урьдчилсан төлөвөөр АНУ-д дунджаас өндөр халуун байх төлөвтэй байгаа бол Мексикийн  чийглэг агаар тэмцээний эхний долоо хоногуудад аянга цахилгаантай ширүүн аадар бороо, цаг агаарын ноцтой үзэгдлийг өдөөж болзошгүй байна.

48 багийн оролцоотой ДАШТ-ийг зохион байгуулж буй 16 хотын нэг болох Торонто хот нийт зургаан тоглолт хүлээн авах бөгөөд эхний тоглолт өнөөдөр буюу /06.12/ баасан гарагт Канад болон Босни, Герцеговинагийн шигшээ багуудын хооронд болно.

Эх сурвалж: Reuters