Дотооддоо аялах аялагчдын тоо нэмэгдэхийн хэрээр алслагдсан байгалийн үзэсгэлэнт газруудад ариун цэврийн цаас хадаг шиг л хийсэх боллоо. Нутгийн иргэд майхантай отоглох цэг байгуулдаг ч мэдээлэл нь хүртээмжгүй. Ариун цэврийн байгууламжийн дэд бүтэц сайн хөгжөөгүй учир аялагчид модны зах бараадаж отоглож байна.

Хүссэн газартаа отоглож, хаа дуртай газраа бие засаж, хэрэглэсэн оо цаас, ашигласан ариун цэврийн хэрэглэлээ үлдээгээд буцах нь зорин ирэх дотоод гадаадын аялагчдын үргээдэг.  

Хэнтий аймгийн Дадал сум нь  түүхэн аялал жуулчлалын  гол төв билээ. Жил бүр дотоод гадаадын олон аялагч очиж, эдийн засагт нь "цус сэлбэдэг". Тэр хэрээр хөрс бохирдож, ил задгай ОО цаас үлдэж буйд нутгийн иргэд гонсойх болов. Эргүүл гардаг ч олон аялагчдад төдийлөн хүрэлцдэггүй байна.

Иймд хэрэв та майхантай аяллаар явахаар төлөвлөж байгаа бол очих газрын отоглох цэгийг судалж, зөөврийн био суултуур, хэрэглэсэн ариун цэврийн цаас, хэрэглэлээ авч явах битүүмжилсэн уут бэлдэж яваарай.   

Зарим хариуцлагатай аялагчид зөөврийн био суултуур бэлдэж аялдаг болжээ. Зөөврийн суултууртаа байгальд хурдан задрах уут хийж  бие засна. Түүн дээрээ бохир задалж үнэргүй шингэн болгох бодис хийнэ. Уутаа газарт булснаар ил харагдах, хөрсний бохирдол үгүй болж байгальд түргэн задрах юм. 

Бидний хэрэглэсэн ариун цэврийн цаас, хэрэглэлийг хэн нэгэн очиж түүхгүй учир байгаль эх маань бүрэн задрахыг нь л хүлээнэ.

Эмэгтэйчүүдийн ариун цэврийн хэрэглэл гэхэд л байгальд бүрэн задрахад 500-800 жил зарцуулдаг.

Хол замд яваа бол төв зам дагуу байгуулж буй түр амрах цэгт саатан, бие засаж, хээр хөдөө зөөврийн суултуур ашиглахыг хэвшил болгоё. Тэгж чадваас хээр газар хийсэх "цагаан хадаггүй" болох юм.

Зөөврийн био суултуур төрлөөсөө хамаарч 50 мянгаас нэг сая хүртэл үнэтэй байна. Харин отоглох цэг Хөвсгөл аймагт 30 мянган төгрөг, Хэнтий аймгийн Дадал суманд нэг өдрийн 20 мянган төгрөгийн үнэтэй байна. 

🌳 Хариуцлагатай аялцгаая.