Сүүлийн үед иргэдийн бэлэн мөнгөний хэрэглээ багасаж, цахим төлбөр тооцоо давамгайлах болсон нь залилагч этгээдүүдэд боломж олгож байна.

Тодруулбал, худалдан авалтын төлбөр хийхдээ интернэт банкны захиалгат гүйлгээ цэсийг ашиглан гүйлгээ хийсэн мэт харагдуулж, амжилттай шилжсэн гэсэн хуурамч дэлгэцийн зураг үзүүлэн залилан мэхлэх тохиолдол нэмэгджээ.

Мөн урьдчилан бэлтгэсэн, фотошопоор засварласан гүйлгээний зургаар иргэдийг төөрөгдүүлж, бараа бүтээгдэхүүнийг авч байгаа хэрэг гарсаар байна. Цагдаагийн байгууллагаас аливаа худалдан авалтын төлбөр заавал банкны дансанд бодитоор орсон эсэхийг шалгах шаардлагатайг удаа дараа анхааруулж байгаа ч энэ төрлийн гэмт хэргийн хохирогчдын тоо буурахгүй хэвээр байна.

Хамгийн сүүлд бүртгэгдсэн бодит жишээг дурдвал, “iPhone 17 Pro” загварын хоёр ширхэг, “iPhone 17 Pro” загварын нэг ширхэг гар утсыг хуурамч урьдчилсан төлбөрийн зураг ашиглан авч, нийт 16 сая 500 мянган төгрөгийн хохирол учруулсан хэрэгт мөрдөн шалгах ажиллагаа үргэлжилж буй. 

Иймд иргэдийг энэ төрлийн залилангийн гэмт хэргийн хохирогч болохоос урьдчилан сэргийлж, дансанд орлого бодитоор орсон эсэхийг заавал нягталж шалгахыг цагдаагийн байгууллагаас сэрэмжлүүллээ. 

Эх сурвалж: ЦЕГ