Монгол Улсын Гавьяат тамирчин, уулын спортын олон улсын хэмжээний мастер, бэлтгэл хурандаа Б.Цэвээндаш “Ice Marathon-2026” төслийн хүрээнд Улаанбаатар хотоос БНХАУ-ын Бээжин хотоор дамжин Тяньжин хүртэл 1418 км замыг өвлийн хүйтэнд ганцаарчилсан гүйлтээр туулаад иржээ. Энэ талаар мэдээлэл хийлээ. 

Гавьяат тамирчин Б.Цэвээндаш хоёрдугаар сарын 5-ны өдөр Сүхбаатарын талбайгаас гараагаа эхэлж, 40-45 хоногийн хугацаанд замаа туулжээ. Тэрээр уг гүйлтэд 2023 оноос хойш бэлтгэсэн аж. 

Монгол Улсын Гавьяат тамирчин, бэлтгэл хурандаа Б.Цэвээндаш:

-Жавар тачигнасан өвлийн хүйтэнд гүйж эхэлсэн. Хэдий ганцаарчилсан гүйлт хэдий ч ард маш олон хүн, баг ажилладаг юм. Маш олон албан байгууллага намайг дэмжсэн, баярлалаа гэж хэлмээр байна. 

Би бэлтгэл хурандаа хүн, шүүхийн шийдвэр гүйцэтгэх байгууллагад ажиллаж байгаад 2025 онд цэргийн байнгын тэтгэвэртээ суусан. Би анх 2008 оноос гүйж эхэлсэн.  Гэхдээ төрийн тусгай албанд ажиллаж байгаа хүн дураараа гүйгээд байж болохгүй. 

Яагаад гүйх болсон бэ гэхээр хүмүүст муу зуршил байдаг. Би архи уудаг, тамхи татдаг, хэт хамааралтай байсан. Үүнийгээ өөрөө ч мэддэггүй байлаа. Нэг л өдөр ээжийгээ бүтэн нойртой хонуулж, сэтгэлийг нь амраая гэж шийдсэн. Ээжийнхээ үс бууралтсан байгааг хараад өрөвдсөн юм. Ингээд ээждээ архи, тамхи хэрэглэхгүй гэж амлаад, нэг л өдөр пүүзээ өмсөөд гараад гүйсэн, ингээд дахиж архи, тамхи хэрэглээгүй.

Өмнө нь лам, бөө гээд хандаагүй шашин, очоогүй газар байхгүй. Тэгсэн ч муу зуршлаа орхиж чадахгүй байлаа. Хүн сэтгэлийн л амьтан юм билээ. Муу зуршлаас сэтгэлээрээ л гарсан. Одоо би өсвөр үеийнхэн, залуусыг хараад гайхдаг.  Баасан гараг бүр наргиж цэнгэж, ах дүү, хамаатан саднаа зовоож, амь насаа ч алдаж байна. Энэ бүхэн архи, согтууруулах ундаатай холбоотой. Тиймээс муу зуршлаас салаасай гэж өөрийн биеэр үлгэрлэхийг хүссэн юм. Тиймээс энэ бол сайн үйлсийн гүйлт.