УИХ-ын Өргөдлийн байнгын хороо өнөөдөр /2026.04.01/ хуралджээ. 

Хаврын ээлжит чуулганы хугацаанд хийх төлөвлөгөөт хяналт шалгалтын цаглаварт тусгасан “Хүүхдийн хоол, хүнсний бүтээгдэхүүний аюулгүй байдлыг хэрхэн хангаж байгаа талаар мэдээлэл сонсох арга хэмжээний хүрээнд Ерөнхий боловсролын сургуулийн хоол үйлдвэрлэл, үйлчилгээний тухай хуулийн хэрэгжилтийн талаар мэдээлэл сонслоо. 

Улсын хэмжээнд энэ хичээлийн жилд 717 ерөнхий боловсролын сургуульд  739382 сурагч, 1046 цэцэрлэгт 231241 хүүхэд,  527 дотуур байранд 34077 хүүхэд  нийт 2299 байгууллагад 1 078 756 суралцагч суралцаж байна. 

Ерөнхий боловсролын сургуулийн 47 хувь буюу 349 430 бага ангийн суралцагч “Үдийн хоол хөтөлбөр”-т хамрагдаж байна. 

“Үдийн хоол хөтөлбөр”-т энэ оны улсын төсөвт 323.9 тэрбум төгрөг баталсан. Ерөнхий боловсролын сургуулийн хоол үйлдвэрлэлд 2025 оны байдлаар 1775 үндэсний үйлдвэрлэгч хүнсний түүхий эд, бүтээгдэхүүн нийлүүлдэг.

Хүн амын хоол тэжээлийн судалгаагаар ерөнхий боловсролын сургуулийн сурагчдын дунд 

• 19.6 хувь нь илүүдэл жинтэй, 
• 6.2 хувь нь таргалалттай, 
• Өсөлт хангалтгүй, хоол тэжээлийн дутагдалтай зэрэг нь бусад хувийг эзэлжээ. 

Үдийн хоолны дундаж илчлэг 394.7 ккал, уураг 17.5 гр, өөх тос 12 гр, нүүрс 54.1 гр байгаа нь хүүхдийн хоногийн шим тэжээлийг хангахгүй, хоолны цэс  нэг төрөлд хэт төвлөрсөн нь хүүхдийн өсөлт хөгжил, дархлаанд сөргөөр нөлөөлдгийг мэргэжилтнүүд хэлжээ.  

УИХ-ын гишүүд цэцэрлэгийн хүүхдийн хоолны шим тэжээлийг сайжруулах, зардлыг нэмэх, дунд ахлах ангийн хүүхдүүдийг “Үдийн хоол хөтөлбөр”-т хамруулах, бүс нутгийн байршлаас хамааран хоол тэжээл, төсвийн ялгавартай байдлыг арилгах, хоол зүйчдийг бэлтгэх, гал тогооны тоног төхөөрөмжийг сайжруулах зэрэг асуудалд хариулт авлаа.

2027 оны улсын төсөвт дунд, ахлах ангийн сурагчдын үдийн цай хөтөлбөрийн төсвийг суулгах юм.