АНУ-ын ерөнхийлөгч Дональд Трамп Financial Times-д өгсөн ярилцлагадаа Ираны Харг арлыг эзэлж магадгүй тухай дурдсан. 

Тус арал нь Ираны газрын тосны хамгийн чухал терминал байрладаг, эдийн засгийн “гол судас” гэж үзэж болох чухал байршил аж. 

Тодруулбал Харг арал нь Ираны эргээс 24 км-ийн зайд орших жижиг арал боловч стратегийн хувьд маш өндөр ач холбогдолтой. Тухайлбал

• Ираны түүхий газрын тосны 90 хувийг энэ арлаар дамжин экспортолдог
• Эх газраас дамжуулах хоолойгоор ирсэн газрын тосыг уг арлаас хөлөг онгоцуудад шууд ачдаг
• Дэлхийн томоохон худалдан авагч орон болох Хятад руу нефть тээвэрлэдэг гол гарц нь энэ арал аж.

Иймээс Харг арлыг онилох нь Ираны эдийн засгийн “зүрхийг” онилсонтой адил гэж шинжээчид үзэж байна.

Шинжээчдийн үзэж буйгаар АНУ Харг арлыг хяналтдаа авснаар Ираны газрын тосны экспортын урсгалыг таслах, орлогын гол эх үүсвэрийг нь зогсоох, дайны санхүүжилтийг сулруулах зорилготой боломж бүрдэх аж. 

Мөн уг арлыг Ираны эх газарт цэргийн ажиллагаа явуулах стратегийн бааз болгох боломжтой гэв.

Энэ сарын 13-ны өдөр Трамп Харг арал дээрх Ираны цэргийн байгууламжуудыг бөмбөгдөж, устгасан гэдгээ мэдэгдсэн. Харин Ираны төрийн хэвлэлийн мэдээлснээр газрын тосны байгууламжид нь ямар нэг хохирол учраагүй гэсэн юм. 

Тэгвэл АНУ яагаад Ираны газрын тосны байгууламжийг онилоогүй вэ? 

Нэгдүгээрт Ираны газрын тосны экспортын 90 хувь нь энэ арлаар дамждаг тул дэлхийн зах зээлд шууд нөлөөлнө. Хоёрдугаарт хэрэв тус байгууламжид цохилт өгсөн бол талуудын мөргөлдөөн илүү өргөжих эрсдэлтэй байв.

Эх сурвалж: ВВС