Зам тээврийн, хөгжлийн сайд асан Б.Энх-Амгалан, Ерөнхийлөгчийн Тамгын даргын дарга асан З.Энхболд нарт холбогдох авлига, албан тушаалтын гэмт хэргийн шүүх хурал Баянзүрх, Сүхбаатар, Чингэлтэй дүүргийн эрүүгийн анхан шатны тойргийн шүүхэд үргэлжилж байна.

Тэднийг эрх мэдэл, албан тушаалын байдлаа урвуулан ашиглаж Өмнөговь аймгийн Цогтцэций сумаас Говь-Сүмбэр аймгийн Сүмбэр сум хүртэлх улсын чанартай 407 км замыг түр хугацаагаар эзэмших эрхийг “Их дэлгэмэл ингүүн” ХХК-д олгож, “Страто” ХХК болон “Их дэлгэмэл ингүүн” ХХК-д давуу байдал бий болгосон буюу Эрүүгийн хуулийн 22.1.3 дахь хэсэгт зааснаар гэмт хэрэг үйлдсэн байж болзошгүй гэж яллах дүгнэлт үйлджээ.  

Гэрч О-ийн “Ямар учраас орон нутгийн чанартай замыг улсын чанартай болгосон шалтгааныг би сайн мэдэхгүй байна. Гэхдээ 407 км замыг өөрийн хөрөнгөөр бариад, засвар арчилгаа хийнэ гэж байгаа нь ямар ч хувийн байгууллага санхүүгийн хувьд их мөнгө зарцуулахаас гадна алдагдалтай ажиллана. Ийм байхад өөрийн хүсэлтээр тухайн замыг эзэмших хүсэлт гаргаад байгаа нь өөр санаа, зорилготой буюу тээврийн асуудалтай холбоотой байх гэж үзэж байгаа.

Албан бус мэдээллээр 1 км замыг барихад 1 тэрбум орчим төгрөг төлөвлөдөг гэж сонсож байсан. Тэгэхээр тухайн компани 407 км замыг 407 орчим тэрбум төгрөгөөр барихаар байна. Ямар учраас улсын хариуцдаг замыг хувийн компани өөрийн их хэмжээний хөрөнгөөр барихаар хүсэлт гаргаад байсныг ойлгохгүй байгаа” гэж мэдүүлснийг прокурор уншиж танилцуулав.

Шүүх хурал үргэлжилж байна.