“Монгол–Оросын бизнес эрхлэгчдийн уулзалт – Курган муж” дугуй ширээний хэлэлцүүлэг боллоо.

Уулзалтын хүрээнд ОХУ-ын Уралын холбооны тойрогт харьяалагддаг, аж үйлдвэр болон машин үйлдвэрлэлийн томоохон төв болох Курган мужийн тэргүүлэх компаниуд барилга, уул уурхай, дэд бүтэц, тоног төхөөрөмжийн чиглэлээрх үйл ажиллагаа, дэвшилтэт технологио танилцуулав.

Мөн Монголын зах зээлд хамтран ажиллах түншлэлийн саналуудыг ярилцлаа.

Курган муж нь Казахстан улстай хиллэдэг газарзүйн байршлаараа Евроазийн тээвэр, ложистикийн стратегийн бүсэд тооцогддог.

Ялангуяа эм, эмнэлгийн бүтээгдэхүүний үйлдвэрлэлээрээ ОХУ-д онцгой байр суурь эзэлдэг.

Тухайлбал, тус мужийн эмийн үйлдвэрүүд ОХУ-ын антибиотикийн нийт хэрэгцээний ойролцоогоор 30 хувийг хангадаг нь Монгол Улстай эрүүл мэнд, эм хангамж, технологи дамжуулах чиглэлээр хамтран ажиллах бодит боломжийг бүрдүүлж байгааг талууд онцоллоо.

Эх сурвалж: ГЕГ