Гадаад харилцааны сайд Б.Батцэцэг Норвег Улсад хийж буй айлчлалынхаа хүрээнд тус улсын Олон улсын хөгжлийн сайд Оoсмүнд Грөвер Аүкрүсттэй уулзжээ.

Уулзалтаар талууд ардчилал, хүний эрх, хууль дээдлэх нийтлэг үнэт зүйлсэд тулгуурласан Монгол, Норвегийн харилцааг эдийн засаг, хөрөнгө оруулалтын агуулгаар баяжуулах талаар санал солилцжээ.

Энэ хүрээнд сэргээгдэх эрчим хүч, байгаль орны хамгаалал, ойн аж ахуй, ногоон технологи, боловсрол, соёл, аялал жуулчлалын салбарт хамтын ажиллагааг өргөжүүлэх өргөн боломж байгааг онцлов.

Мөн “Сонгуульд нэр дэвшигчид, улс төрийн намууд болон сонгуулийн кампанит ажлын санхүүжилтийн ил тод байдлыг нэмэгдүүлэх тухай” НҮБ-ын тогтоолыг Норвег Улстай хамтран санаачилж, батлуулсныг тэмдэглэжээ.

Монгол улс уур амьсгалын өөрчлөлт, цөлжилттэй тэмцэх, бэлчээр, хөрсний зохистой менежмент, ойжуулалт зэрэг чиглэлээр хамтран ажиллах санал тавьж, наймдугаар сард болох COP 17 талуудын бага хуралд сайд Оосмүнд Грөвер Аүкрүстийг оролцохыг урьжээ.

Эх сурвалж: ГХЯ