УИХ-ын гишүүн Х.Тэмүүжин чуулганы хуралдааны үеэр байр сууриа илэрхийлэв.

Тэрбээр "УИХ-тай холбоотой хууль тогтоомжийг боловсронгуй болгох хэрэгцээ үнэхээр байгаа юм байна. Ямар улсын парламентад иргэд нь танилцах гээд орж ирэхэд үг хэлээд, алга ташуулдаг юм бэ? 

Парламентын гишүүд нь иргэдээ ордонд залж авчирдаг тийм улс байхгүй. Иргэд нь дуртай үедээ парламентын ордонтой орж ирээд танилцаад гарж байдаг. 

Гишүүд татвар төлөгчдийн мөнгөөр танхимд хуралдаж байхдаа, сонгогчдын итгэлээр энд ажиллаж байхдаа, олгосон цаг хугацааг улс орныхоо төлөө зориулах ёстой болохоос биш сонгуулийн пиараа хийгээд алга ташуулаад сууж байдаг зүйл байхгүй. 

Үндсэн хуульд "УИХ гадаад, дотоод бодлогын бүх асуудлыг санаачлах эрхтэй" гэж заасан. Бодлогын асуудал санаачилж байгаа тохиолдолд маргаж, мэтгэлцэх ёстой. Гишүүдийн үг хэлж байгаа нь бодлогын асуудлыг хэлэлцэх хамгийн суурь шат нь юм. Тийм учраас чуулганы танхимд зөвхөн мандаттай хүн үг хэлнэ гэдэг зарчим парламент ёсонд байдаг. 

Үндсэн хуулийн 33 дугаар зүйл дээр "Ерөнхийлөгч улс орны дотоод, гадаад байдлын нэн чухал асуудлаар мэдээлэл хийнэ, санал оруулна" гэсэн байгаа. 

Хэн дуртай нь үг хэлдгийг болиулах ёстой. УИХ-ын гишүүдээс бусад нь мэдээлэл өгнө, танилцуулга хийнэ, саналаа оруулна. Харин гишүүд үг хэлнэ. Энэ эрхийг чуулганаас гадагш гаргаж, гүтгэсэн доромжилсон зэргээр шүүхийн асуудал болгоод явж болохгүй. 

Бодлогын асуудлаар мэтгэлцэж байгаа хүмүүс санаа бодлоо хурц илэрхийлэх шаардлага гарна. Энийг чуулган дотроо шийддэг байх ёстой. 

Ямар ч хуульгүйгээр индэр дээр гурван сэнтий тавиад феодализм шиг суулгаж байна. Ерөнхий сайдын суудал энд байж болохгүй. Ажлаа тайлагнах ёстой хүн чуулганы тархин дээр сууж болохгүй. Доошоо орж ирж суух ёстой. Тэгж байж парламентын мэтгэлцээн явна. 

Ерөнхийлөгчийн индэр дээр микрофон байж болохгүй шүү дээ. Мэдээлэл өгөх бол бууж ирж, индрээс ярих ёстой. Энэ бол хууль тогтоох байгууллага. Үндсэн хуульд заасны дагуу ард түмнийг төлөөлөх ганц л институт байгаа нь УИХ. Ерөнхийлөгч ард түмнийг төлөөлдөггүй" гэв.