Ерөнхийлөгч У.Хүрэлсүх УИХ-ын гишүүнийг эргүүлэн татах эрх зүйн үүдийг нээсэн, хуулийн төсөл боловсруулснаа нэг сарын өмнө танилцуулсан. 

Тойргийн болон жагсаалтын гэж УИХ-ын гишүүдийг ангилан ялгаварласан, намын даргад их эрх мэдэл төвлөрүүлсэн, парламентын дархлааг сулруулсан зэрэг олон үндэслэлээр УИХ-ын нэр бүхий гишүүд болон иргэний нийгмийн байгууллагууд энэ төслийг хүчтэй эсэргүүцсээр байна. 

Тэгвэл төрийн тэргүүн У.Хүрэлсүх Ерөнхийлөгчийн сонгуулиар хэдэн санал авсан бэ? Тэрээр бүх ард түмнийг төлөөлөх үү? 

Дээрх хуулийн төслийг УИХ-ын Төрийн байгуулалтын байнгын хороогоор хэлэлцэх үед УИХ-ын гишүүн Л.Оюун-Эрдэнэ "Бүх ард түмнээс сонгогдсон Ерөнхийлөгч гэж хууль санаачлагч эд хэдэн удаа хэллээ. Харин УИХ-ын гишүүд би төрийн эрх барих дээд байгууллагын гишүүний хувиар гэж байна. Энэ төсөл хоёр институтын хоорондох маргааныг дэвэргэж, хэн нь том бэ гэдэг дээрээ туллаа" гэсэн юм. 

2021-06-90-ний өдөр Ухнаагийн Хүрэлсүх Монгол Улсын Ерөнхийлөгчийн найм дахь удаагийн сонгуульд Монгол Ардын Намаас (МАН) нэр дэвшиж, нийт сонгогчдын 68 гаруй хувийн саналаар ялжээ. 

Сонгуулийн хуульд Монгол Улсын Ерөнхийлөгчийн сонгуульд саналаа өгсөн иргэдийн 50+1 хувь буюу нэр дэвшигч нь Ерөнхийлөгчийн сонгуульд оролцсон нийт сонгогчийн олонхын санал авч байж сонгогдохоор заасан. У.Хүрэлсүх саналаа өгсөн нийт сонгогчийн  821 136 хүнээс буюу 68 хувийн санал авчээ.
 
Нийт сонгогчдын 32 хувь нь түүнийг дэмжээгүй байна.