Замын цагдаагийн газраас цагдаа нарыг жолооны үнэмлэх шалгадаг багажтай болгох төсөл боловсруулжээ. Энэ талаар тус газрын мэргэжил хяналтын хэлтсийн дарга Г.Өлзийсайханаас тодрууллаа.

-Замын цагдаа нарыг жолооны үнэмлэх шалгадаг багажтай болгох ажил ямар шатандаа явна?
-Төсөл боловсруулж, судалгаа хийж байна. Дээрх багажны санхүүжилтийг Ерөнхий сайдын дэмжлэгтэйгээр хийнэ. Үнэмлэх шалгагч багажийг ирэх оны ихээр ашиглаж эхлэх төлөвтэй байгаа. Энэ хугацаанд шалгагч багажийг аль орноос авчрах, манай орны нөхцөлд тохирч байгаа эсэхийг шалгах юм.

-Ийм багажтай болсноор гарах сайн үр дагавар нь юу вэ?
-Үнэмлэхээ хаяагүй ч хаячихсан гэж үнэмлэх аваад хэд хэдэн үнэмлэхтэй явж байгаа жолооч нар байдаг. Эрхээ хасуулчихаад өмнө нь авсан үнэмлэхээ ашигладаг тохиолдлууд байна. Тэгвэл энэ багажаар жолоочийг хэдэн үнэмлэх авч байсан, хэдэн удаа зөрчил гаргаж байсан зэргийг нь тогтооно. Ингэснээр олон үнэмлэх ашиглах боломжгүй болох юм. Тендерт ялсан “Смарт солушин” компани жолооны үнэмлэх шалгагч багажинд тохируулж жолоочтой холбоотой нэмэлт мэдээллийг үнэмлэхэнд суурилуулж өгнө.

-Жолооны үнэмлэх хэзээ хэвлэгдэх вэ. Хэвлэгдэх гээд хүлээгдэж байгаа хэчнээн үнэмлэх байна?
-Жолооны үнэмлэх хэвлэдэг “DMIT” компани удаа дараа гэрээнд заасан үүргээ биелүүлэлгүй жолооны үнэмлэх хэвлэх ажлыг тасалдуулсан. Тиймээс Замын цагдаагийн газраас хамтран ажиллах гэрээгээ цуцалсан. Гэтэл тухайн компани гэрээгээ цуцаллаа хэмээн шүүхэд хандчихаад байгаа. “DMIT” компани шүүхэд хандсанаас болоод жолооны үнэмлэх хэвлэхэд бэлэн болчихсон байгаа “Смарт солушин” компани үнэмлэхийг хэвлэлгүй хүлээж байна. Хэвлэгдэх гээд хүлээгдэж буй 40 мянган жолооны үнэмлэх байгаа.

О.Бүрнээ