УОК-оос цаг үеийн асуудлаар мэдээлэл өгөх хэвлэлийн хурал зарласан. Мэдээллийг УОК-ын нарийн бичгийн дарга, хурандаа Т. Баярхүү, Ус цаг уур, орчны шинжилгээний газрын ахлах мэргэжилтэн О.Оюунчимэг нар танилцуулж байна.

УОК-ын нарийн бичгийн дарга, хурандаа Т. Баярхүү:

-Нийт нутгийн 30 орчим хувьд цасан бүрхүүлтэй байсан. Өнөөдрийн байдлаар 5 орчим хувь нь цастай байна. Увс аймаг хамгийн их цастай байгаа. Нийт 6.3 сая мал хорогдсон. Сүхбаатар аймаг 1.5 сая, Хэнтий 842, Архангай 658, Төв 535 зэргээр мал хорогдлоо. Улсын хэмжээнд малын сэг, зэм устгах ажил үргэлжилж байна.

Голуудын ихээр цас, мөстэй, их хэмжээний ус хуримтлагдсан байгаа учраас шар усны үерийн эрсдэл арилаагүй байгаа.  Хүмүүнлэгийн тусламжийн хүрээнд УОК-т иргэн, аж ахуйн нэгжээс 3.6 тэрбум төгрөгийн бэлэн мөнгөний хандив цугларсан.

Ус цаг уур, орчны шинжилгээний газрын ахлах мэргэжилтэн О.Оюунчимэг:

-Ойрын өдрүүдэд цаг агаар нэлээд дулаарлаа. Говийн бүс нутгийн өмнөд хэсгээр 18-23 градус дулаан, цастай газраар +3 болон -2 градус өнжсөн байна. Ирэх тав хоногт буюу маргааш уулархаг нутгаар бороо, нойтон цас орно. Энэ сарын 12-наас баруун аймгуудын нутгаар цаг агаар муудна.

Дөрөвдүгээр сарын 14-нд говийн аймгуудын хойд хэсгээр бороо, нойтон цас орж, цасан шуурга шуурахаар байна. Улмаар цаг агаарын аюултай үзэгдэл болох нөхцөл бүрдэхийг онцгойлон анхааруулъя.