БНСУ-ын боловсролын яам 2025 он гэхэд бүх өндөр төлбөртөй, элит ерөнхий боловсролын сургуулиудыг татан буулгахаар болжээ. 

Энэхүү төлөвлөгөөг хэрэгжүүлэхийн тулд 2025 оноос эхлээд жил бүр улсын төсвөөс 223 сая ам.доллар зарцуулах юм байна. Өмнөд Солонгосын засгийн газар бүх хүүхдэд тэгш, хүртээмжтэй боловсролыг олгох зорилгоор дээрх шийдвэрийг өнгөрсөн долоо хоногт гаргажээ.

Өндөр төлбөртэй, элит сургуулийн төгсөгчид нэр хүндтэй коллеж, их сургуульд элсэн орох магадлал өндөр байдаг нь боловсролын тэгш байдлыг хангахгүй байгаагийн илрэл аж. Өөрөөр хэлбэл, төгсөж байгаа ахлах сургуулийн зэрэглэл нь их сургуульд тэнцэх шалгуурын нэг болсон байна. Сургуулиудын төлбөрийн ялгаа өндөр байдаг нь нийгэмд тэгш бус байдал үүсгэх нөхцөл болж буй.

2022 онд засаг солигдсон ч уг төлөвлөгөө үргэлжилнэ 

Засгийн газрын төлөвлөгөөний дагуу хувийн, гадаад хэлний болон олон улсын сургуулиуд 2025 он гэхэд бүгд онцгой статусаа алдаж, улсын сургуулиудтай адил нөхцөлөөр хүүхэд элсүүлнэ. 

Энэхүү өөрчлөлттэй зэрэгцэн сурагчдын үнэлгээний системийг бүхлээр нь өөрчлөх шийдвэр гаргажээ. Сурагчдын авъяас чадвар, хичээл зүтгэлийг нь үндэслэн шударгаар үнэлэх тогтолцоог нэвтрүүлэх юм байна.

2022 онд засаг солигдсон ч уг төлөвлөгөө хэвээр үргэлжилнэ гэдгийг боловсролын яамны сайд Ёо Юн Хэ хэвлэлийн хурлын үеэр мэдэгджээ. Сонирхуулахад, Өмнөд Солонгосын ахлах ангийн нийт сурагчдын 4 хувь нь өндөр төлбөртэй элит сургуульд, үлдсэн 96 хувь нь улсын сургуульд суралцдаг аж.

Эх сурвалж: Korea times