Хоёрдугаар сарын 28-ны өдрийн Зэвсэгт хүчний 310-р ангийн алба хаагч, хүнд даацын автомашинд дайруулж, амь насаа алдсан хэрэг гарчээ. 19.00 цагийн үед буюу ажлын бус цагаар осол болсон байна. 

Уг хэргийн талаар ЗХЖШ-аас мэдээлэл өглөө. ЗХЖШ-ын Хяналт шалгалт үнэлгээний газрын шинжилгээ үнэлгээний ахлах мэргэжилтэн, дэд хурандаа С.Өлзийтогтох "Тухайн өдөр сарын төлөвлөгөөт ажлын дагуу “Найман шарга” сувиллын газарт хайрга татахаар томилогдсон ахлах ахлагч албан үүргээ гүйцэтгэх явцдаа осолд орсон. Тухайн үед хайргаа самосвал машинд ачиж, дууссаны дараа хөдөлсөн бөгөөд тухайн карьерт элсэрхэг, хөрс гулгамтгай, өгсүүр байсан тул өгсөж явахдаа хүч алдан зогссон байна. Ингээд ахлах ахлагч эвүүр хийхээр буух үед уг осол гарсан" гэлээ. 

Хувийн барилга дээр ажиллахаар явсан гэх мэдээллийг үгүйсгэлээ

Ахлах ахлагч Г төлөвлөгөөт бус хувийн барилга дээр ажиллахаар явсан гэх мэдээлэл байгаа бөгөөд ЗХЖШ-аас ийм зүйлд хяналт тавьж ажилладаг, төлөвлөгөөний дагуу ажилд явах үед осол гарсан гэдгийг хэлж байна.

ЗХЖШ-аас өгсөн мэдээллээр “Найман шарга” сувилал нь 310-р ангийн харьяа бөгөөд барилгын цахилгаан татахад туслахаар явсан гэв.

Хэргийн талаар цагдаагийн байгууллагад мэдэгдээгүй гэсэн мэдээлэл гарсан ч 19.00 цаг өнгөрөөд хэргийн талаар цагдаад мэдэгдэж, Тээврийн цагдаагийн байгууллага ирсэн гэв.

Харин ахлах ахлагч эмнэлгийн тусламж авч чадалгүй газар дээрээ амиа алдсан эсэх талаарх мэдээллийг цагдаагийн байгууллага өгнө гэлээ. 

Батлан хамгаалах яамны харьяа нийт таван амралтын газар, нэг хүүхдийн зуслан байдаг юм байна.

Тодруулбал,

• Зэвсэгт хүчний 310 дугаар ангийн харьяа “Найман шарга” амралтын газар нь 1 ээлжиндээ 120-150 хүн хүлээн авах хүчин чадалтай,
• “Энхийн төлөө цогцолбор төв” нь 3 одтой зочид буудлын зэрэглэлийн үйлчилгээ үзүүлдэг. Зэрэглэлээсээ хамаарч өрөөний үнэ нь өдрийн 80000, 90000, 130000 төгрөг,
• “Багабаян” амралтын хувьд нэг ээлжиндээ 80-120 хүн хүлээн авах боломжтой. Өвөл, зуны байр, монгол гэрээс сонголтоо хийж болно. Соёлын төв, бүжгийн талбайтай, сагсан бөмбөг, гар бөмбөг, унадаг дугуй, хийн буудлага, явган аялалд хамрагдах гээд чөлөөт цагаа өнгөрүүлэх боломжтой. Нэг хүн өдөрт 48000 төгрөг,
• “Ахмадын амралт” нь цэргийн тэтгэвэрт гарсан ахмадуудыг хүлээн авах зориулалттай,
• Зэвсэгт хүчний 232 дугаар ангийн харьяа “Хоёр загал” амралтын газар,
• “Шонхор” хүүхдийн зуслан Сэлэнгэ аймгийн Түнхэл тосгонд байрладаг.