Дорноговь аймгийн Алтан  ширээ суманд газрын тос боловсруулах үйлдвэрийг Бүгд найрамдах Энэтхэг улсын 1.2 тэрбум ам.долларын хөнгөлөлттэй зээлээр барина. Энэхүү нефтийн үйлдвэрийн дэд бүтцийг нэг жилийн дотор барьж дуусгасан бөгөөд нээлтийн ёслол өнөөдөр боллоо.

Ерөнхий сайд У.Хүрэлсүх манай улсад анх удаа барьж буй газрын тос боловсруулах үйлдвэрийн дэд бүтцийг байгуулсан, шилдэг ажилтнуудад шагнал, талархал гардуулсан.

Өнөөдөр Алтан ширээ суманд болж буй нээлтэд Ерөнхий сайд У.Хүрэлсүх, БНЭУ-ын Газрын тос, байгалийн хийн сайд Д.Претхан нар оролцож байна.

Хөгжлийн банкны 250 тэрбум төгрөгийн зээлээр хэрэгжүүлсэн, газрын тос боловсруулах үйлдвэрийн дэд бүтцийн төслүүд: Дараах ажлуудыг өнгөрсөн оны зургаадугаар сард эхлүүлсэн юм.

ҮЙЛДВЭРИЙГ САЙНШАНД ХОТТОЙ ХОЛБОХ, 27  КМ САЛБАР ТӨМӨР ЗАМ

УБТЗ хувь нийлүүлсэн нийгэмлэгийн инженер техникийн ажилтнууд төмөр замыг барьсан юм. Үйлдвэрийн хүнд тоног төхөөрөмжүүд, барилгын материалуудыг энэ төмөр замаар зөөнө. Замыг найман сарын дотор олон улсын жишгээс гурав дахин хямд өртгөөр Монголчууд өөрсдөө барьж, зорчигчоо тээвэрлэж эхэлжээ. 

ХҮНД ДААЦЫН АВТО ЗАМ

Авто замыг барихад БХЯ-ны Зэвсэгт хүчний 7780-р ангийнхан оролцон ажиллажээ.   

2019 оны аравдугаар сарын 8-нд Газрын тосны үйлдвэрийн төмөр зам, автозам, 110 КВ-ын цахилгаан дамжуулах агаарын шугам, дэд станцыг улсын комисс хүлээж авсан.

Сайншанд-Замын-Үүд чиглэлийн улсын чанартай хатуу хучилттай авто замын Сайншанд сум руу салсан дөрвөн замын уулзвараас нефть боловсруулах үйлдвэр хүртэлх хүнд даацын, тусгай зориулалтын зам нь 18.8 км урт.

ЦАХИЛГААН ДАМЖУУЛАХ ШУГАМ СҮЛЖЭЭ

Энэ төслийг Цахилгаан дамжуулах үндэсний сүлжээ ТӨХК гүйцэтгэжээ.                     

ГАЗРЫН ТОС БОЛОВСРУУЛАХ ҮЙЛДВЭРИЙН АЧ ХОЛБОГДОЛ

Үйлдвэр ашиглалтад орсноор дотоодын түүхий эдэд түшиглэн газрын тос боловсруулж, түлш шатахуунаа өөрсдөө хангадаг болно. Цаашлаад аж үйлдвэрийн цогцолборын томоохон бүрэлдэхүүн хэсэг болох нефть-химийн үйлдвэрийн суурь болох юм. Үйлдвэрийг тосны олборлолтын хэмжээнд нийцүүлэн жилд 1,5 сая тонн газрын тос боловсруулах хүчин чадалтайгаар, түүхий тос дамжуулах хоолойн хамт байгуулахаар төлөвлөжээ. Энэ төслийг хэрэгжүүлэх үүрэг бүхий “Монгол газрын тос боловсруулах үйлдвэр” ТӨХХК-ийг Засгийн газрын 2017 оны 04 дүгээр сарын 04-ний өдрийн 92 дугаар тогтоолоор байгуулсан юм.

Тээврийн хэрэгслийн тоо сүүлийн жилүүдэд эрс нэмэгдэн, уул уурхай, хөдөө аж ахуйн салбарын өсөлтийг даган газрын тосны бүтээгдэхүүний хэрэглээ нэмэгдсээр байна. Өнгөрсөн таван жилд ОХУ, БНХАУ-аас жилд дунджаар 1,25 сая тонн газрын тосны бүтээгдэхүүн авч, 1 тэрбум орчим ам. доллар зарцуулжээ. Энэ нь нийт импортын 25-30 хувийг эзэлсэн байна.

Бид өнөөг хүртэл газрын тосны бүтээгдэхүүний импортоос 100 хувь хараат байна. Энэ нь гадаад худалдааны тэнцэлд сөргөөр нөлөөлж, үнийн өсөлт, инфляц хөөрөгдөх нэг хүчин зүйл болдог. Манай орны газрын тосны батлагдсан нөөц, олборлолтоос харахад боловсруулах үйлдвэрийг түүхий эдээр хангах боломжтой хэмжээнд хүрсэн тул үйлдвэр байгуулах шийдвэрт хүрсэн юм.

Олборлолт 2021 онд 1,6 сая тоннд хүрч, 2040 он хүртэл энэ түвшинд байх төлөвтэй байна. Мөн олборлолт явуулж буй ордуудын ойролцоох Буйр XVIII, Өмнөговь аймгийн Галба XI талбайгаас тос илэрчээ. Нэмэлт судалгаа хийснээр шинээр газрын тосны шинэ орд бий болж, нөөц нэмэгдэх магадлалтай.