Монгол Улс 2015 он хүртэл цементийн эрэлт, хэрэгцээний дийлэнхийг буюу 56-88 хувийг БНХАУ-аас импортолдог байсан бол 2015 онд цементийн импортын татварыг нэмэгдүүлж, мөн дотоодын үйлдвэрлэгчдийн тоо нэмэгдсэнээр импортоор авдаг цементийн хэмжээ 17-25 хувь болтлоо буурсан талаар “Барилга Эм Эн” компани мэдээлж байна.

Ингэснээр жилд гадагшаа урсдаг байсан 14-97 сая ам.доллар таван сая ам.доллар болтлоо буурчээ. Дотоодын цементийн борлуулалт 2013 онд 12 хувь байсан бол 2017 онд 80 хувьд хүрч өссөн байна.

Тухайлбал, 2015 онд жилд нэг сая тонн цемент үйлдвэрлэх хүчин чадалтай “Монполимет” компанийн “Монцемент” үйлдвэр, 860 сая тонны хүчин чадалтай “Мөнхийн Баян гал” компанийн цементийн үйлдвэр, мөн 2016 онд жилд нэг сая тонн цемент үйлдвэрлэх хүчин чадалтай “МАК” компанийн “Хөх цавын цемент шохойн үйлдвэр” тус тус ашиглалтад орсноор цементийн хэрэгцээг дотоодын зах зээлээс хангах нөхцөл нэмэгджээ.

Монгол Улсад өөрийн өртөг, үйлдвэрийн хүчин чадлаасаа хамаарч нэг тонн цемент 84-105 мянган төгрөг байдаг тооцоо байдаг. Харин худалдаалах үнийн тухайд “Барилга Эм Эн”-ийн мэдээлснээр “Монцемент”-ийн цемент Улаанбаатар хотод тонн нь 160 мянган төгрөгөөр худалдаалагдаж байгаа бол “МАК” евро цемент 168 мянган төгрөгийн үнэтэй байгаа аж. Харин Хөтөлийн цемент “Барилгачин групп"-т тонн нь 170 мянган төгрөгөөр худалдаалагдаж байна.
                                                                                                                                Т.Дэмбэрэлням